„מיס ישׂראל‟ און אָבאַמאַ

Miss Israel and Obama

ייִטייִש איינאַוו, אַן עטיאָפּיש־ישׂראלדיקע פֿרוי, ווערט באַקרוינט „מלכּת היופֿי‟, מיטוואָך, אין חיפֿה
Avishag Shar Yashuv/Flash90/JTA
ייִטייִש איינאַוו, אַן עטיאָפּיש־ישׂראלדיקע פֿרוי, ווערט באַקרוינט „מלכּת היופֿי‟, מיטוואָך, אין חיפֿה

פֿון ייִט״אַ

Published March 14, 2013, issue of March 15, 2013.

ירושלים. — איטיִיִש אײַנאַוו, די ערשטע „מיס ישׂראל‟ פֿון עטיאָפּישן אָפּשטאַם, איז פֿאַרבעטן געוואָרן צו עסן מיטן אַמעריקאַנער פּרעזידענט אָבאַמאַ בעת אַ מאָלצײַט, אָרגאַניזירט דורכן ישׂראלדיקן פּרעזידענט, שמעון פּערעס. אײַנאַוו, אַ 21־יאָריק מיידל, וועלכע איז „באַקרוינט‟ געוואָרן ווי די שענסטע אינעם לאַנד מיט צוויי וואָכן צוריק, האָט מיטוואָך איבערגעגעבן, אַז זי האַלט אָבאַמאַ פֿאַר אַ מוסטער און אַ קוואַל פֿון אינספּיראַציע.

אין אַן אינטערוויו פֿאַר „ידיעות אַחרונות‟, די פּאָפּולערער טעגלעכע צײַטונג, האָט זי דערקלערט, אַז דער אַמעריקאַנער פּרעזידענט האָט געוויזן, אַז יעדער מענטש קאָן מיט זײַן ווילן דורכברעכן די באַריערן פֿון רעליגיע, ראַסע און געשלעכט. אין אַן אַנדער אינטערוויו, פֿאַר דעם „דזשערוזאַלעם פּאָסט‟, האָט זי צוגעגעבן, אַז מע האָט זי, מסתּמא, אויסגעקליבן צו באַטייליקן זיך אין דער בכּבֿודיקער סעודה, ווײַל זי איז די ערשטע שוואַרצע „מיס ישׂראל‟ און אָבאַמאַ איז דער ערשטער שוואַרצער אַמעריקאַנער פּרעזידענט. „די צוויי קומען צוזאַמען‟.

אײַנאַוו האָט עמיגרירט פֿון עטיאָפּיע קיין ישׂראל, צוזאַמען מיט אירע זיידע-באָבע, ווען זי איז געווען 12 יאָר אַלט. זי האָט געמאָלדן אויפֿן ישׂראלדיקן צווייטן טעלעוויזיע-קאַנאַל, אַז זי קלײַבט זיך צו זאָגן דעם פּרעזידענט, אַז ער איז פֿאַר איר אַ הויכגעשעצטער מוסטער, און צו בעטן בײַ אים צו באַפֿרײַען יונתן פּאָלאַרדן.

דער מאָלצײַט וועט פֿאָרקומען די קומענדיקע וואָך, בעת אָבאַמאַס וויזיט קיין ישׂראל.



Would you like to receive updates about new stories?






















We will not share your e-mail address or other personal information.

Already subscribed? Manage your subscription.