קאָנצערט פֿון די מאַרטירער־פֿידלען

Concert of the Violins of the Martyred

די מיטגלידער פֿונעם „פֿילהאַרמאָנישן אָרקעסטער פֿון מאָנטע־קאַרלאָ‟, וועלכע וועלן שפּילן אויף די פֿידלען פֿון די אומגעקומענע ייִדן
OPMC/Martinez
די מיטגלידער פֿונעם „פֿילהאַרמאָנישן אָרקעסטער פֿון מאָנטע־קאַרלאָ‟, וועלכע וועלן שפּילן אויף די פֿידלען פֿון די אומגעקומענע ייִדן

פֿון ייִט״אַ

Published April 30, 2013, issue of May 24, 2013.

דער „פֿילהאַרמאָנישער אָרקעסטער פֿון מאָנטע־קאַרלאָ‟ וועט די קומעדיקע וואָך אויפֿטרעטן מיט אַ קאָנצערט, וווּ מע וועט שפּילן אויף עטלעכע מוזיקאַלישע אינסטרומענטן, וואָס האָבן געהערט צו די ייִדן, וועלכע זענען דערהרגעט געוואָרן דורך די נאַציס.

דעם 5טן מײַ וועט מען שפּילן די פֿידל אינעם „גרימאַלדי־פֿאָרום‟ אין מאָנאַקאָ, און אַ מאָדעראַטאָר וועט דערציילן וועגן דעם לעבן פֿון די פֿאַרשטאָרבענע מוזיקער, האָט איבערגעגעבן די פֿראַנצויזישע טאָג־צײַטונג, Nice Matain.

דער קאָנצערט, וואָס ווערט באַצייכנט ווי „די פֿידלען פֿון האָפֿענונג‟, איז אָרגאַניזירט געוואָרן דורך סמדר אײַזנבערג, די פּרעזידענטין פֿון דער אָרגאַניזאַציע, „פֿרײַנד פֿונעם פֿילהאַרמאָנישן אָרקעסטער פֿון מאָנטע־קאַרלאָ‟. זי האָט באַקומען די מוזיקאַלישע אינסטרומענטן פֿונעם אַטעליע פֿון אַמנון ווײַנשטיין — אַ ישׂראלדיקער פֿידלמאַכער, וועלכער זאַמלט און רעסטאַוורירט שוין יאָרן לאַנג די מוזיקאַלישע אינסטרומענטן, וואָס האָבן אַמאָל געהערט צו די קרבנות פֿון חורבן.

אַחוץ די ביאָגראַפֿיעס פֿון די אומגעקומענע פֿידלער, וועט מען אויך דערציילן וועגן דעם לעבן פֿון עטלעכע מוזיקער, וועלכע האָבן יאָ איבערגעלעבט דעם חורבן, אַרײַנגערעכנט אַלמאַ ראָזע — אַ דיריגענטין פֿונעם פֿרויען־אָרקעסטער אין אוישוויץ, און אַ פּלימעניצע פֿונעם קאָמפּאָזיטאָר, גוסטאַוו מאַלער.

מע וועט אויך פֿאַרגעדענקען האַנס קראַסאַ און גדעון קלײַן — צוויי ייִדישע מוזיקער, וועלכע האָבן נישט אויפֿגעהערט צו שאַפֿן מוזיק ביז זייער טויט אין די נאַציסטישע גאַז־קאַמערן.

דאָס געלט, וואָס וועט אַרײַנקומען פֿון די קאָנצערטן, וועט מען שענקען דעם נעווראָלאָגישן פֿאָרש־צענטער בײַם „העברעיִשן אוניווערסיטעט‟.