בריטישע דעפּוטאַטן דריקן אויף פּוילן

British Lawmakers Press Poland

רות דיטש — די ייִדישע ענגלישע באַראָנעסע, וועלכע האָט איניציִיִרט דעם בריוו פֿון די בריטישע דעפּוטאַטן צום פּוילישן פּרעמיער
Youtube
רות דיטש — די ייִדישע ענגלישע באַראָנעסע, וועלכע האָט איניציִיִרט דעם בריוו פֿון די בריטישע דעפּוטאַטן צום פּוילישן פּרעמיער

פֿון ייִט״אַ

Published February 26, 2014, issue of March 14, 2014.

אַ גרופּע בריטישע פּאַרלאַמענט־דעפּוטאַטן האָט אָנגעהויבן אַ פּאָליטישע קאַמפּאַניע, האָפֿנדיק איבערצוצײַגן דעם פּוילישן פּרעמיער־מיניסטער אויסצופֿירן דעם צוזאָג וועגן די קאָמפּענסאַציעס פֿאַר דער שארית־הפּליטה. אינעם יאָר 2009, איז פּוילן געווען צווישן די 46 לענדער, וועלכע האָבן אונטערגעשריבן אַ דעקלאַראַציע, לויט וועלכער דאָס אייגנטום, וואָס איז באַרויבט געוואָרן דורך די נאַציס, וועט אומגעקערט ווערן צו זייערע געזעצלעכע בעלי־בתּים. דערווײַל האָט די פּוילישע רעגירונג, אָבער, נישט אײַנגעפֿירט קיין געזעצן וועגן חורבן־רעסטיטוציעס.

מאָנטיק, דעם 24סטן פֿעברואַר, האָבן 15 מיטגלידער פֿונעם בריטישן פּאַרלאַמענט, צוזאַמען מיט 35 לאָרדן און באַראָנעסעס, אָפּגעשיקט אַ בריוו דעם פּוילישן פּרעמיער, דאָנאַלד טוסק, אין וועלכן זיי טענהן, אַז די פּוילישע רעגירונג האָט נאָך אַפֿילו נישט אָנערקענט איר אַחריות אויסצוצאָלן די קאָמפּענסאַציעס פֿאַר די חורבן־געליטענע. אויבן־אָן אינעם בריוו איז געשטאַנען די חתימה פֿון רות דיטש — אַ ייִדישע מיטגלידערין אין דער בריטישער פּאַלאַטע פֿון לאָרדן, וואָס אירע זיידעס און באָבעס פֿון ביידע זײַטן האָבן געהאַט אַ ממשותדיק אייגנטום אין פּוילן פֿאַר דער מלחמה.

דער „פֿאָרשטייער־ראַט פֿון בריטישע ייִדן‟ און די „ייִדישע וועלט־אָרגאַניזאַציע פֿאַר רעסטיטוציעס‟ („WJRO‟) האָבן קאָאָרדינירט די איניציאַטיוו. די מחברים האָבן באַטאָנט, אַז דאָס אייגנטום, וואָס איז „קאָנפֿיסקירט געוואָרן דורך די נאַציס און דערנאָך נאַציאָנאַליזירט געוואָרן דורך דער קאָמוניסטישער מלוכה‟, מוז אומגעקערט ווערן צו די געוועזענע בעלי־בתּים אָדער זייערע יורשים, וואָס נישט ווייניק פֿון זיי זענען בריטישע בירגער.

גדעון טיילאָר, אַ מומחה אין די רעסטיטוציע־ענינים, וועלכער פֿלעגט אָנפֿירן מיט דער „תּבֿיעות־קאָנפֿערענץ‟ קעגן דײַטשלאַנד און העלפֿט איצט „WJRO‟, האָט איבערגעגעבן, אַז צום ערשטן מאָל האָט אַ גרופּע אייראָפּעיִשע פּאַרלאַמענט־דעפּוטאַטן אָנגעשריבן אַזאַ בשותּפֿותדיקן בריוו. אין נאָוועמבער, האָט קאָלעט אַביטל, די סעקרעטאַרין פֿון „WJRO‟, אָפּגעשיקט אַ בריוו דעם פּוילישן פּרעזידענט, בראָניסלאַוו קאָמאָראָווסקי, גלײַך פֿאַר זײַן וויזיט אין ישׂראל, בעטנדיק אים „אויסצופֿירן די צוזאָגן‟ וועגן די חורבן־קאָמפּענסאַציעס.