גרויסער וואַרשעווער בית־עולם פֿאַרשוועכט געוואָרן

Large Jewish Cemetery in Warsaw is Vandalized

דער בית־עולם אויף אָקאָפּאָווע־גאַס
inyourpocket.com
דער בית־עולם אויף אָקאָפּאָווע־גאַס

פֿון ייִט״אַ

Published February 03, 2015, issue of February 23, 2015.

וואַרשע. — דער פּלויט פֿון אַ ייִדישן בית־עולם אין וואַרשע — איינער פֿון די גרעסטע בית־הקבֿרות אין גאַנץ אייראָפּע — איז וואַנדאַליזירט געוואָרן.

דער אַטאַק אויפֿן בית־עולם אויף דער אָקאָפּאָווע־גאַס איז פֿאָרגעקומען שבת, און מע האָט עס אַנטדעקט מיט אַ טאָג שפּעטער. ביזן הײַנטיקן טאָג באַערדיקט מען דאָרט מענטשן.

מיט רויטער שפּריצפֿאַרב האָט עמעצער פֿאַרשמירט דעם פּלויט מיט די ווערטער „ייִדן פֿאַר שחיטה‟ און די דאַטע „10.12.14‟. דאָס איז די דאַטע, ווען דער פּוילישער קאָנסטיטוציע־טריבונאַל האָט געפּסקנט, אַז דער פֿאַרווער קעגן כּשרער שחיטה שטימט נישט מיט דער קאָנסטיטוציע. אויך דער טויער פֿונעם בית־עולם איז פֿאַרשמירט געוואָרן מיט געלער פֿאַרב.

ווען דער דירעקטאָר פֿונעם בית־הקבֿרות, פּשעמיסלאַוו שפּילמאַן, האָט אַנטדעקט דעם וואַנדאַליזם, האָט ער עס תּיכּף געמאָלדן דער פּאָליציי. שפּילמאַן האָט געזאָגט, אַז ער ווייסט נישט, צי דער וואַנדאַליזם איז „אַן אָפּטו פֿון אומדערוואַקסענע כוליגאַנעס אָדער אַ פּאָליטישע אַקציע‟.

„אַזוינע אינצידענטן קומען פֿאָר זעלטן,‟ האָט ער איבערגעגעבן דער ייִט״אַ. „אין 2013 האָט עמעצער פֿאַרשוועכט די וואַנט פֿון בית־עולם מיט אַ האַקנקרייץ, אָבער במשך פֿון די פֿאַרגאַנגענע 12 יאָר איז קיין מאָל נישט פֿאָרגעקומען אַ וואַנדאַליזם פֿון אַזאַ סאָרט.‟

„ווייניקער ווי אַ וואָך נאָך דעם 70סטן יאָרטאָג פֿון דער באַפֿרײַונג פֿון אוישוויץ־בירקענאַו, דאַרפֿן מיר זיך פֿאַרנעמען מיט אַקציעס פֿון שׂינאה קעגן ייִדן,‟ האָט באַמערקט אַנאַ כיפּטשינסקאַ, די פּרעזידענטין פֿון דער וואַרשעווער קהילה. „דער זאָג ׳ייִדן פֿאַר שחיטה’ איז נישט בלויז אַ דערנידעריקונג, וואָס די געזעלשאַפֿט טאָר נישט איגנאָרירן, נאָר אויך אַ רוף צו בלוט־פֿאַרגיסונג און דראָונגען, וואָס מיר דאַרפֿן זיך אַלע היטן דערפֿון.‟