אַ סך רומענער ווילן זען זייער לאַנד „ייִדן־פֿרײַ‟

Popular Support for a "Jew-Free" Romania


פֿון ייִט״אַ

Published August 06, 2015, issue of August 21, 2015.

די פֿאַרגאַנגענע וואָך, האָט דער „נאַציאָנאַלער אינסטיטוט פֿון חורבן־שטודיעס אויפֿן נאָמען פֿון עליע וויזעל‟ אין רומעניע, פֿאַרעפֿנטלעכט די רעזולטאַטן פֿון אַן אויספֿרעג פֿון אַ טויזנט דערוואַקסענע רומענער, וועלכער האָט געוויזן, אַז כּמעט אַ פֿערטל פֿון די אויסגעפֿרעגטע ווילן נישט האָבן קיין ייִדישע תּושבֿים אין זייער לאַנד.

דער אויספֿרעג איז דורכגעפֿירט געוואָרן אין יולי, דורכן „צענטער פֿאַר מיינונג־ און מאַרק־שטודיעס‟. 11 פּראָצענט רומענער האָבן געטענהט, אַז ייִדן שטעלן מיט זיך פֿאָר אַ „פּראָבלעם‟ פֿאַר רומעניע, און 22 פּראָצענט האָבן געזאָגט, אַז זיי וואָלט געוואָלט זען בלויז ייִדישע טוריסטן, נישט קיין תּושבֿים, אין זייער לאַנד.

פֿאַרן חורבן, האָט די ייִדישע באַפֿעלקערונג אין רומעניע באַטראָפֿן מער ווי 750,000 נפֿשות. אונטערן פּראָ־נאַציסטישן רעזשים פֿון יאָן אַנטאָנעסקו, האָבן די אָרטיקע קאָלאַבאָראַטאָרן געהאָלפֿן די נאַציס צו פֿאַרניכטן בערך אַ העלפֿט פֿון די אָרטיקע ייִדן. דערצו, האָבן די רומענישע זעלנער אויסגעהרגעט 120,000 ייִדן אויפֿן שטח פֿון דער הײַנטיקער אוקראַיִנע.

כּמעט דרײַ פֿערטל פֿון די אויסגעפֿרעגטע האָבן געענטפֿערט, אַז זיי האָבן געהערט וועגן דעם ייִדישן חורבן. דאָס איז אויף 12 פּראָצענט גרעסער, ווי לויט אַ פֿריִערדיקן באַריכט פֿונעם יאָר 2007. בלויז אַ דריטל רומענער גלייבן אָבער, אַז זייער לאַנד האָט אויך אַ שײַכות צום נאַצי־גענאָציד. בלויז 19 פּראָצענט פֿון די, וואָס ווייסן יאָ וועגן דעם אומקום פֿון די רומענישע ייִדן, מיינען, אַז אַנטאָנעסקוס רעגירונג טראָגט דאָס אַחריות פֿאַר דעם. אַדרבה, 54 פּראָצענט האָבן זיך גוט אָפּגערופֿן וועגן דעם דאָזיקן „פּאַטריאָטישן‟ פֿירער.

הײַנט זענען אין רומעניע געבליבן ווייניק ייִדן פֿון דער שארית־הפּליטה. ס׳רובֿ פֿון די, וואָס האָבן איבערגעלעבט די מלחמה, האָבן עמיגרירט. די קליינע אָרטיקע ייִדישע קהילה פֿון עטלעכע טויזנט נפֿשות איז קאָנצענטרירט, על־פּי־רובֿ, אין בוקאַרעשט.