גוטע נײַעס פֿאַר פֿרומע ייִדן אין פּרינסטאָן

Good News For Orthodox Jews at Princeton

יעדן דאָנערשטיק פֿירט דער פּרינסטאָן־צווײַג פֿון „יבֿנה‟ אָן מיט תּורה לערנען אינעם CJL
יעדן דאָנערשטיק פֿירט דער פּרינסטאָן־צווײַג פֿון „יבֿנה‟ אָן מיט תּורה לערנען אינעם CJL

פֿון שׂרה־רחל שעכטער

Published August 30, 2015, issue of September 18, 2015.

דעם פֿאַרגאַנגענעם דינסטיק האָט דער פּרינסטאָן־אוניווערסיטעט געמאָלדן, אַז מע וועט במשך פֿון די קומעדיקע פּאָר וואָכן אויפֿשטעלן אַן עירובֿ אַרום ס׳רובֿ פֿונעם קאַמפּוס, ווי אויך אַרום געוויסע טיילן פֿונעם אַרומיקן שטעטל פּרינסטאָן, ניו־דזשערזי, וואָס וועט דערמעגלעכן פֿרומע ייִדישע סטודענטן און אָנגעשטעלטע צו טראָגן זאַכן שבת.

אין אַ בריוו, וואָס דער אוניווערסיטעט האָט אַרויסגעשיקט צו אַלע סטודענטן אינעם פּרינסטאָן־„הילל‟, צו זייערע עלטערן און צו די ייִדישע אַדמיניסטראַטאָרן און פֿאַקולטעטן, האָט דער אוניווערסיטעט באַצייכנט דעם נײַעם שריט ווי „אַ באַווײַז פֿון פּרינסטאָנס איבערגעגעבנקייט צו אַ מולטי־קולטורעלער סבֿיבֿה און אַ סימן פֿון זײַן אויסערגעוויינטלעכער שטיצע פֿונעם ייִדישן לעבן אויפֿן קאַמפּוס‟.

די אינסטיטוציע אינוועסטירט טאַקע אַ סך אינעם ייִדישן רעליגיעזן לעבן פֿון די סטודענטן, האָט הרבֿ אַריאל פֿישער, דער דירעקטאָר פֿון אָרטאָדאָקסישע טעטיקייטן אין פּרינסטאָן, געזאָגט דעם „פֿאָרווערטס‟. פּרינסטאָן פֿאַרמאָגט, למשל, דעם Center for Jewish Life, באַקאַנט ווי דער CJL — דער בנין, וווּ דער „הילל‟ געפֿינט זיך — און פּאַסט גוט אויף אויף אים. דער אוניווערסיטעט באַצאָלט אויך פֿאַרן משגיח פֿון די כּשרע מאָלצײַטן, וואָס האָבן דווקא זייער אַ גוטן שם בײַ די סטודענטן. „אַפֿילו נישט־ייִדישע סטודענטן קומען צו אונדז עסן די כּשרע מאָלצײַטן, ווײַל מע זאָגט, אַז ס׳איז דאָס געשמאַקסטע עסן אויפֿן קאַמפּוס!‟ האָט פֿישער באַמערקט.

די באַמיִונגען פֿון דער קאָלעדזש־אַדמיניסטראַציע צו באַפֿרידיקן די רעליגיעזע באַדערפֿענישן פֿון זייערע סטודענטן זעט מען אויך אין שײַכות מיט אַנדערע גלויבנס. פֿאַר די מוסולמענישע סטודענטן, למשל, האָט פּרינסטאָן אַרײַנגעשטעלט אַ ספּעציעלן פֿאָנטאַן, וווּ זיי קענען זיך אָפּוואַשן די הענט און פֿיס פֿאַר זייער תּפֿילה טאָן.

אַ גרופּע פּרינסטאָן־סטודענטן מאַכן וועקסענע ליכטלעך לכּבֿוד חנוכּה (רעכטס) און באַקן המן־טאַשן אויף פּורים
אַ גרופּע פּרינסטאָן־סטודענטן מאַכן וועקסענע ליכטלעך לכּבֿוד חנוכּה (רעכטס) און באַקן המן־טאַשן אויף פּורים

דאָס איז אַ ווײַטער שפּרונג פֿונעם צוגאַנג צו ייִדן און אַנדערע מינאָריטעטן, וואָס האָט אַ מאָל געהערשט אין פּרינסטאָן־אוניווערסיטעט, ווען מע האָט (ווי בײַ ס׳רובֿ פֿון די „אײַווי־ליג‟ קאָלעדזשן) שטאַרק באַגרענעצט די צאָל ייִדישע און שוואַרצע סטודענטן, וואָס זענען יעדעס יאָר אָנגענומען געוואָרן, און וווּ די פּרינסטאָן „וועטשערע־קלובן‟ האָבן אַרויסגעוויזן אַן אָפֿענעם אַנטיסעמיטיזם.