ידיעות פֿון בוענאָס־אײַרעס

News From Buenos Aires

ד״ר כוליאָ שלאָסער, דער פּרעזידענט פֿון דער „דאַיאַ‟
ד״ר כוליאָ שלאָסער, דער פּרעזידענט פֿון דער „דאַיאַ‟

פֿון אַבֿרהם ליכטענבוים

Published September 24, 2015, issue of October 16, 2015.

די ידיעות פֿון בוענאָס־אײַרעס, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

אַ באַגריסונג די ייִדן פֿון דער פּרעזידענטין

ענדלעך, האָט די אַרגענטינער פּרעזידענטין באַגריסט דעם ייִדישן ייִשובֿ צום נײַעם יאָר. אין איר נאָמען האָט גערעדט עדואַרדאָ דע פּעדראָ, סעקרעטאַר פֿון דער פּרעזידענץ, אויפֿן לחיים, װאָס די לאַטײַן־אַמעריקאַנער סעקציע פֿון ייִדישן װעלט־קאָנגרעס האָט דורכגעפֿירט פֿאַר יום־כּיפּור. אין זײַן װאָרט האָט ער געזאָגט, אַז לעצטנס זײַנען פֿאָרגעקומען „אומפֿאַרשטענדענישן צװישן דער רעגירונג און דעם ייִשובֿ‟; ער איז אָבער „איבערגעצײַגט, אַז דאָס װעט זיך נאָרמאַליזירן, װײַל אַלע פֿאַקטאָרן זײַנען אויפֿריכטיקע‟.


די „רויטע אַכטונג‟ גייט אָן ווײַטער

די אַרגענטינער רעגירונג, האָט, דורך דעם אויסערן־מיניסטער העקטאָר טימערמאַן, דערקלערט, אַז די אַרגענטינער פּרעזידענטין װיל אָנגיין מיט דער „רויטער אַכטונג‟, װאָס „אינטערפּאָל‟ האָט באַשטימט צו פֿאַרכאַפּן די אַכט באַשולדיקטע איראַנער אינעם אַטענטאַט אויף דער בוענאָס־אײַרעסער קהילה.

דאָך, איז אָט־דער באַשלוס אָפּהענגיק פֿונעם ריכטער קאַניקאָבאַ קאָראַל, װאָס פֿירט אָן מיט דער אויספֿאָרשונג, װאָס שלעפּט זיך שוין 21 יאָר. טימערמאַן האָט זיך געטראָפֿן מיט יורגען שטאָק, גענעראַל־סעקרעטאַר פֿון „אינטערפּאָל‟ און אים איבערגעגעבן, אַז ער האָפֿט, אַז די קומענדיקע רעגירונג װעט אָנהאַלטן אָט די שטעלונג, נאָך דעם 10טן דעצעמבער. ער האָט אויך איבערגעגעבן, אַז אַרגענטינע װעט פֿאַרשטאַרקן איר קאַמף קעגן נאַרקאָטיק־מיסחר און דעם טעראָריזם. אויף דער טרעפֿונג האָט מען נישט דערמאָנט דעם פּראָקוראָר ניסמאַנס טויט, װאָס האָט אָנגעקלאָגט דער אַרגענטינער פּרעזידענטין אין פֿאַרדעקן איראַנס באַטייליקונג אינעם אַטענטאַט.


די פּרעזידענטין וועט אַרויסגערופֿן ווערן אין געריכט

דער אַדװאָקאַט פֿון ניסמאַנס געװעזענער פֿרוי, די ריכטערין אַראָזשאָ סאַלגאַדאָ, װעט אַרויסרופֿן די פּרעזידענטין קריסטינאַ פֿערנאַנדעז־קירכנער װי אַן עדות אין דער אויספֿאָרשונג, װאָס די ריכטערין פּאַלמאַגיני פֿירט אָן שוין איבער אַכט חדשים. די אַדוואָקאַטין װיל, אַז די פּרעזידענטין זאָל איבערגעבן די אינפֿאָרמאַציע, װאָס זי האָט פֿאַרמאָגט, װען גלײַך נאָך דעם װי מען האָט געפֿונען ניסמאַנען אַ טויטן, האָט זי זיך אַרויסגעזאָגט, אַז זי גלייבט, אַז מען האָט אים דערהרגעט. נאָך דעם האָט די פּרעזידענטין געענדערט איר מיינונג.


די יוסטיץ האָט אָפּגעוואָרפֿן דעם אָנקלאָג קעגן „דאַיאַ‟

די יוסטיץ האָט צו נישט געמאַכט דעם אָנקלאָג, װאָס דער אַדװאָקאַט כואַן לאַבאַקע האָט צוגעשטעלט קעגן דעם פּרעזידענט פֿון דער „דאַיאַ‟ — ד״ר כוליאָ שלאָסער, דעם אָנפֿירער פֿון די פֿאָנדן, װאָס מאָנען אַ חובֿ בײַ אַרגענטינע; בײַ פּאָל זינגער; 2 אַרגענטינער דעפּוטאַטן און דרײַ ייִדישע אינטעלעקטואַלן.

לאַבאַקע, װאָס פֿאַרטיידיקט די נאַציס אין אַרגענטינע, האָט זיי באַשולדיקט װי „פֿאַררעטערס קעגן פֿאָטערלאַנד‟, װען דער געװעזענער דירעקטאָר פֿון דער „דאַיאַ‟, כאָרכע עלבאַום, האָט פּובליקירט אַן אַרטיקל אין אַ בוענאָס־אײַרעסער צײַטונג, וווּ ער האָט געשריבן, אַז ניסמאַן האָט קאָמפּלאָטירט מיט די פֿאָנדן און פֿון זיי באַקומען געלטער צו דריקן אויף אַרגענטינע, זי זאָל אויסצאָלן איר חובֿ. די ריכטערס האָבן אין זייער פּסק־דין דערקלערט, אַז אַן אַרטיקל אין אַ צײַטונג איז נישט קיין דאָקומענט, און אַז זיי געפֿינען נישט קיין פֿאַרברעכן אינעם אַרטיקל. אין דער „דאַיאַ‟ האָט מען דערװאַרט אַזאַ רעזאָלוציע, װײַל װי כוליאָ שלאָסער האָט דערקלערט, האָט די באַשולדיקונג קיין שום אָנשפּאַר נישט.


נײַער פּרט אינעם מישפּט, פֿאַרבונדן מיטן אויפֿרײַס פֿון „דאַיאַ‟

אינעם מישפּט װאָס גייט אָן קעגן דעם געװעזענעם פּרעזידענט קאַרלאָס מענעם; אַ ריכטער; צװיי פּראָקוראָרן; דעם געװעזענעם פֿאָרזיצער פֿון דער „דאַיאַ‟ — ראובֿן ברכה, און אַנדערע באַאַמטע, האָט אַן עדות געזאָגט, אַז דער געװעזענער פּאָליציי־שעף כואַן כאָסע ריבעלי איז געװען די לאָקאַלע פֿאַרבינדונג מיט די באַשולדיקטע איראַנער. ריבעלי קען נישט באַװײַזן פֿון װאַנען איז צו אים אַרײַנגעקומען אַ מיליאָן דאָלאַר. ער האָט דערקלערט, אַז דאָס איז אַ ירושה פֿון זײַן פֿאָטער, אַ פּשוטער אָנגעשטעלטער אין די אַרגענטינער באַנען. מיט צען יאָר צוריק האָט מען איגנאָרירט די דעטאַלן אינעם משפּט, וווּ מען האָט קיינעם נישט באַשולדיקט.


די „פֿונדאַציע נאַטאַלי דפֿנה פֿלעקסער‟ העלפֿט קינדער

נאַטאַלי איז געשטאָרבן פֿון אַ קאַנסער, װען זי איז געװען 7 יאָר אַלט. איר מאַמע, עדיט גרינשפּאַנהאָלץ האָט זיך נישט געלאָזט פֿאַרפֿירן פֿונעם טרויער און מיט 20 יאָר צוריק האָט זי געשאַפֿן אַ פֿונדאַציע, װאָס העלפֿט אַרויס קראַנקע קינדער און זייערע משפּחות. זי דעקט די מעדיצינישע באַדינונגען און רפֿואות. די „פֿונדאַציע נאַטאַלי דפֿנה פֿלעקסער‟ איז געװאָרן אַ מוסטער נישט נאָר אין אַרגענטינע.

1,200 קינדער װערן אַרויסגעהאָלפֿן אין אַרגענטינע. די פֿונדאַציע איז אויסגעצייכנט געװאָרן פֿאַר איר בײַטראָג אינעם קאַמף קעגן קאַנסער און פֿאַרן „פֿאַרװאַנדלען װייטיק און טרויער אין פּראַקטישער אַרבעט‟.


דער ישׂראל־אַמבאַסאַדאָר איז „טרייף‟

בראַזיל האָט אָפּגעװאָרפֿן די נאָמינירונג פֿון דעם ישׂראל־אַמבאַסאַדאָר דני דיין, מיטן אַרגומענט, אַז ער איז אַן אַקטיװיסט, װאָס װוינט אין די אָקופּירטע פּאַלעסטינער שטחים. דיין איז אַ געבוירענער אין אַרגענטינע, ער איז עולה געװען אין 1971 אין עלטער פֿון 15 יאָר און איז געװען במשך אַ סך צײַט דער פֿאָרזיצער אינעם מוניציפּאַלן ראָט אין שומרון.


דער אַרגענטינער רבֿ וועט באַגלייטן דעם פּויפּס אין ניו־יאָרק

דער פּויפּסט פֿראַנציס האָט פֿאַרבעטן זײַן אַרגענטינער חבֿר, דעם רבֿ אַבֿרהם סקאָרקאַ, ער זאָל אים באַגלייטן בעת זײַן באַזוך אין ניו־יאָרק. נאָך נעילה איז ער אָפּגעפֿאָרן קיין אַמעריקע, װוּ ער װעט זײַן אַ מיטגליד פֿונעם פּויפּסט דעלעגאַציע.