„זאַראָס בעקערײַ‟ אין בראָנקס שליסט זיך

Zaro's Bronx Bakery is Closing


פֿון „פֿאָרווערטס‟־רעדאַקציע

Published December 29, 2015, issue of January 22, 2016.

אַ באַליבטע כּשרע בעקערײַ אין בראָנקס האָט מאָנטיק געשלאָסן אירע טירן נאָך מער ווי 50 יאָר.

„זאַראָס בעקערײַ‟ אין פּאַרקטשעסטער, מיזרח־בראָנקס, וואָס איז געגרינדעט געוואָרן אין 1959, איז געווען דאָס לעצטע אָרט אין דער געגנט, וווּ מע האָט נאָך געקענט קויפֿן פֿרישע בייגל, חלה, ראָגעלעך און קעז־„דייניש‟. דער אייגנטימער פֿון דער בעקערײַ, מײַקל זאַראָ, האָט געזאָגט, אַז ער האָט געמוזט פֿאַרמאַכן דאָס געשעפֿט צוליב דעם הויכן דירה־געלט.

דאָס בעקערײַ איז געווען איינע פֿון 13 פֿיליאַלן פֿון „זאַראָס‟ איבער דער שטאָט ניו־יאָרק און ניו־דזשערזי.

נור מאָזנו, אַ פֿאַרוואַלטער, וואָס האָט געאַרבעט די לעצטע נײַן יאָר אין דער בעקערײַ, האָט בעת אַן אינטערוויו מיט דער „ניו־יאָרק טײַמס‟, איבערגעגעבן, אַז אַ סך קונים זענען די וואָך אַרײַנגעקומען זאָגן, אַז זיי וועלן בענקען נאָכן פֿריש־געבאַקענעם ברויט און בייגל.

„עטלעכע מענטשן האָבן מיך מיט טרערן אין די אויגן געפֿרעגט: ’ווער נאָך וועט וויסן פּונקט וואָס איך וויל, נאָך איידער איך עפֿן דאָס מויל?‘‟ האָט מאָזנו געזאָגט.

הגם פּאַרקטשעסטער איז אַ מאָל געווען אַ לעבעדיקער ייִדישער ייִשובֿ, פֿול מיט סינאַגאָגעס און כּשרע יאַטקעס, זענען די הײַנטיקע אײַנוווינער, צום גרעסטן טייל, שוואַרצע און לאַטינאָס. פֿון דעסטוועגן, האָבן אַפֿילו די נישט־ייִדישע קונים ליב געהאַט די פֿרישע, היימישע געבעקסן אין „זאַראָס‟.

„איך קום אָפֿט אַהער גלײַך נאָך דער אַרבעט, אויב איך האָב נישט קיין כּוח צו קאָכן,‟ האָט טאָמאַס אַסעפֿאַ, אַ 36־יאָריקער שוואַרצער אײַנוווינער פֿון פּאַרקטשעסטער, דערקלערט פֿאַר אַ רעפּאָרטער. „עס שטערט מיך זייער אָט די טענדענץ פֿון פֿאַרבײַטן די אַלטע היימישע קראָמען מיט ריזיקע געשעפֿטן. עס געשעט איצט גלײַך פֿאַר אונדזערע אויגן.‟