„לידער פֿון גן־עדן‟ שפּילט איצט אין ישׂראל

"Songs of Paradise" Now Playing in Israel

אַ סצענע פֿונעם מיוזיקל „לידער פֿון גן־עדן‟, דורכגעפֿירט פֿון „ייִדישפּיל‟
אַ סצענע פֿונעם מיוזיקל „לידער פֿון גן־עדן‟, דורכגעפֿירט פֿון „ייִדישפּיל‟

פֿון „פֿאָרווערטס‟־רעדאַקציע

Published June 05, 2016, issue of June 25, 2016.
מרים האָפֿמאַן, לעבן אַן אַפֿיש וואָס רעקלאַמירט די פּרעמיערע, תּל־אָבֿיבֿ
מרים האָפֿמאַן, לעבן אַן אַפֿיש וואָס רעקלאַמירט די פּרעמיערע, תּל־אָבֿיבֿ

די וואָך איז אין תּל־אָבֿיבֿ פֿאָרגעקומען די עפֿענונג פֿונעם מיוזיקל „לידער פֿון גן־עדן‟, דורכגעפֿירט פֿונעם „ייִדישפּיל‟־טעאַטער.

דער מיוזיקל, אונטערן רעזשי פֿון אַבֿי האָפֿמאַן, איז באַזירט אויף די „חומש־לידער‟ פֿון איציק מאַנגער. דעם טעקסט פֿון דער פּיעסע האָבן אָנגעשריבן מרים האָפֿמאַן און רינע באָראָ, און די מוזיק — ראָזאַלי גערוט.

די פֿאָרשטעלונג איז אויף ייִדיש, און ווערט באַגלייט פֿון העברעיִשע און רוסישע אייבערקעפּלעך.

„לידער פֿון גן־עדן‟ אינסצענירט איציק מאַנגערס אָריגינעלע, הומאָריסטישע באַאַרבעטונג פֿון ספֿר בראשית, אויפֿן אימפּראָוויזאַטאָרישן סטיל פֿון דער טעלעוויזיע־קאָמעדיע Saturday Night Live, ניצנדיק מוזיקאַלישע עלעמענטן פֿון אָפּערטערעס, דזשעז, ראָק, ראַפּ, בראָדוויי־מעלאָדיעס און „סווינג‟.

דאָס געמיש פֿון אַלטערטימלעכע געשיכטעס און מאָדערנע סיטואַציעס העלפֿט שאַפֿן געניאַלע מאָמענטן: מע זעט ווי אָדם הראשון און די מוטער חווה ליגן אויף דער זון אין גן־עדן; קין און הבֿל גריזשען די מאַמע, און אויך איינער דעם אַנדערן ביז עס קומט צום טרויעריק באַרימטן סוף; און אַבֿרהם אַבֿינו, זײַן פֿרוי שׂרה און זײַן „געליבטע‟, הגר, שפּילן אויס זייערע באַציִוּנגען ווי זיי וואָלטן טאַקע געלעבט אינעם הײַנטיקן יאָרהונדערט.

אַחוץ תּל־אָבֿיבֿ, וועט דער מיוזיקל גאַסטראָלירן אין אַ צאָל שטעט איבערן לאַנד, אַרײַנגערעכנט היפֿה, אַשדוד, נתניה, באר־שבֿע, אַשקלון, מודין און ירושלים.