ייִדיש־פּאָסטן אין שיקאַגע

Yiddish Position in Chicago

Wikimedia Commons

פֿון „פֿאָרווערטס‟־רעדאַקציע

Published June 21, 2016, issue of June 25, 2016.

דער אָפּטייל פֿאַר גערמאַנישע שטודיעס בײַם שיקאַגער אוניווערסיטעט זוכט אַ ייִדיש־לעקטאָר, וואָס זאָל דאָרט לערנען טיילצײַטיק בשעתן אַקאַדעמישן יאָר 2016־2017. דער קאַנדידאַט מוז האָבן אַ דיפּלאָם (מאַגיסטער אָדער דאָקטאָראַט) אין גערמאַנישע שטודיעס אָדער אין לינגוויסטיק (ספּעציאַליזירט אין ייִדיש). מע דאַרף רעדן ייִדיש פֿליסיק, זיך גוט אויסקענען אין דער ייִדישער ליטעראַטור, און האָבן דערפֿאַרונג ווי אַ לערער אויף דער קאַלעדזש־ אָדער אוניווערסיטעט־מדרגה. דער לעקטאָר וועט לערנען שפּראַכקלאַסן פֿאַר אָנהייבער, מיטלדיקע און אַוואַנסירטע סטודענטן. די קאַנדידאַטן דאַרפֿן אַרײַנשיקן אַ באַגלייטבריוו, אַ רעזומע, און אַ רשימה קורסן, וואָס זיי האָבן שוין געלערנט. די אַפּליקאַציע דאַרף מען אַרויפֿלאָדן אויף דער וועבזײַט פֿונעם אוניווערסיטעט ביזן 15טן יולי: http://tinyurl.com/hpols3d.

שיקאַגע האָט אַ חשובֿ אָרט אין דער געשיכטע פֿון דער ייִדישער ליטעראַטור און קולטור אין אַמעריקע. די שטאָט האָט נאָך הײַנט אַן אייגענע „ייִוואָ־געזעלשאַפֿט‟, און דער „פֿאָרווערטס‟ האָט דאָרט געהאַט אַ ספּעציעלן ביוראָ, וואָס האָט צענדליקער יאָרן אַרויסגעגעבן אַ ספּעציעלן נומער פֿאַר די „מיטוועסטיקע‟ לייענער. אין שיקאַגע זײַנען געווען דרײַצן באַזונדערע ייִדישע פֿאַרלאַגן. אַ סך זייער שיינע אויסגאַבעס זײַנען אַרויס אַ דאַנק דער פֿינאַנציעלער שטיץ פֿונעם גרויסן געלטגעבער און מעצענאַט י. ל. שטיין. לעצטנס האָט די פֿריִערדיקע ייִדיש־לעקטאָרין בײַם אוניווערסיטעט פֿון שיקאַגע, ד״ר שׂרה (סאָני) יודקאָף, אָרגאַניזירט אַן אויסשטעלונג פֿון אַזעלכע ביכער אין דער דאָרטיקער ביבליאָטעק.