„ייִדיש־זומער־ווײַמאַר‟ אויף טעלעוויזיע

Yiddish Summar Weimar on TV

פֿון „פֿאָרווערטס‟־רעדאַקציע

Published August 03, 2016, issue of August 29, 2016.

די דײַשטישע עפֿנטלעכע טעלעוויזיע־נעץ 3SAT האָט לעצטנס טראַנסמיטירט אַ פּרטימדיקן באַריכט וועגן דעם פֿעסטיוואַל „ייִדיש־זומער־ווײַמאַר‟. אינעם רעפּאָרטאַזש, פֿון איבער 30 מינוט, דערקלערט דער אָנפֿירער פֿון דער פּראָגראַם, מאַרקוס קאַווקאַ, וועגן דער געשיכטע פֿונעם פֿעסטיוואַל און זײַנע הויפּט־אַקטיוויטעטן.

די פּראָגראַם ווײַזט אַ סך אויסצוגן פֿון טאַנץ־ און געזאַנג־וואַרשטאַטן, ווי אויך אינטערוויוען מיט פֿאַרשידענע אָנטיילנעמער. אַלען בערן, דער קינסטלערישער דירעקטאָר און הויפּט־גרינדער פֿונעם פֿעסטיוואַל, דערקלערט אין אַן אינטערוויו מיט מאַרקוס קאַווקאַן אַז דער פֿעסטיוואַל האָט זיך אָנגעהויבן צוליב דעם, וואָס די שטאָט ווײַמאַר האָט אים פֿאַרבעטן אָנצופֿירן מיט אַ סעריע וואַרשטאַטן אויף אַ וואָך אין 1999. אַ דאַנק דער גרויסער הצלחה פֿון די וואַרשטאַטן איז „ייִדיש־זומער־ווײַמאַר‟ געוואַקסן מיט יעדן יאָר ביז עס איז, סוף־כּל־סוף, פֿאַרוואַנדלט געוואָרן אין איינעם פֿון די גרעסטע פֿעסטיוואַלן פֿון ייִדישער מוזיק און קולטור אויף דער וועלט.

בערן דערקלערט ווײַטער, אַז יעדעס יאָר ווערט דער עולם וואָס מער אינטערנאַציאָנאַל; הײַיאָר האָבן אָנטייל גענומען מענטשן פֿון 26 לענדער. וועגן זײַנע צילן פֿאַר דער צוקונפֿט, דערקלערט בערן אַז ער האָפֿט אַז „ייִדיש־זומער־ווײַמאַר‟ וועט קענען פּראָדוצירן מער קולטורעלע אונטערנעמונגען מחוץ די ראַמען פֿונעם פֿעסטיוואַל. הײַיאָר אָרגאַניזירט דער פֿעסטיוואַל, למשל, אַן אייגענע אַקאַדעמישע קאָנפֿערענץ.

די פּראָגראַם גיט אויך אַ פּרטימדיקן בליק אויף אַ נײַער פּיעסע, וואָס עס שאַפֿט דזשעני ראָמיין און מײַקל וועקס אויפֿן סמך פֿונעם „בבֿא־בוך‟, אַ ווערק וואָס וועקס דערקלערט, מיט אַ ביסל איראָניע, „לייגט זיך ניט באמת אויפֿן שׂכל‟.

די גאַנצע פּראַגראַם קען מען זען דאָ: http://www.3sat.de/page/?source=/ard/sendung/188039/index.html