ווידעאָ: וויצן פֿון פֿײַוויש פֿינקעלס זיידע

Video: Fyvush Finkel's Grandfather's Jokes

פֿון „פֿאָרווערטס‟־רעדאַקציע

Published August 18, 2016, issue of August 29, 2016.

אַזוי ווי אַ סך וויכטיקע פּערזענלעכקייטן אין דער ייִדיש־וועלט, וואָס האָבן נאָך געלעבט אין די לעצטע 6 יאָר, האָט דער אַקטיאָר און קאָמיקער פֿײַוויש פֿינקעל געמאַכט אַן אינטערוויו מיטן „פּראָיעקט פֿון געשיכטע־בעל־פּה אויפֿן נאָמען פֿון וועקסלער‟ בײַם „ייִדישן ביכער־צענטער‟. אינעם אינטערוויו — סײַ אויף ייִדיש און סײַ אויף ענגליש — רעדט פֿינקעל וועגן זײַן לאַנגער קאַריערע אויף דער ייִדישער בינע, די גרויסע שטערן און באַרימטע פּערזענלעכקייטן, מיט וועמען ער האָט מיטגעאַרבעט; וועגן זײַנע מיינונגען לגבי דער צוקונפֿט פֿון ייִדיש בכלל און פֿונעם ייִדישן טעאַטער בפֿרט.

כאָטש מע קען נאָך ניט זען דעם גאַנצן אינטערוויו אויף דער אינטערנעץ (עס דויערט אַ לאַנגע צײַט ביז דער „ביכער־צענטער‟ גרייט צו די פֿילמען), האָט מען לעצטנס ספּעציעל פֿאַרעפֿנטלעכט אויסצוגן פֿונעם אינטערוויו מיט פֿײַוויש פֿינקעל, צוליב דער טרויעריקער ידיעה, אַז ער איז ניפֿטר געוואָרן. די אויסצוגן, מיט ענגלישע אונטערקעפּלעך, וואָס מע האָט שוין פֿון פֿריִער געהאַט צוגעגרייט, שילדערן אַ פֿילפֿאַרביק בילד פֿון די אַמאָליקע ניו־יאָרקער ייִדישע טעאַטערס. אינעם חנעוודיקן שטיקל פֿילם דערציילט פֿינקעל וועגן דער השפּעה, וואָס זײַן זיידע האָט געהאַט אויף זײַן צוגאַנג צו קאָמעדיע.

אין אַן אַנדער אויסצוג דערקלערט פֿײַוויש, ווי אַזוי ער איז מצליח אויפֿצוטרעטן אויף דער ייִדישער בינע, ניט געקוקט אויף די פּראָבלעמען, וואָס עס האָט אים געשאַפֿן דער פֿאַראיין פֿון ייִדישע אַקטיאָרן („היברו־עקטאָרס־יוניאָן‟).

אין נאָך אַ שטיקל דערקלערט פֿינקעל וועגן די פֿיר טעאַטערס, וואָס האָבן עקזיסטירט אין „בראַונזוויל‟, ברוקלין, ווען ער איז געווען אַ קינד.