נײַע לעקציעס פֿון „ייִדישפּאָפּ‟ זענען גרייט

New YiddishPOP Lessons Are Ready


פֿון „פֿאָרווערטס‟־רעדאַקציע

Published November 18, 2016, issue of November 23, 2016.

נאָך אַ שטיקל הפֿסקה האָט זיך אָנגעהויבן רעגולער צו דערשײַנען נײַע לעקציעס פֿון דער אינטעראַקטיווער פּראָגראַם „ייִדישפּאָפּ‟, וואָס לערנט מאַמע־לשון פֿאַר קינד־און־קייט דורך אַנימירטע פֿילמען און געניטונגען אינעם פֿאָרעם פֿון ווידעאָ־שפּילן. אין אויגוסט איז אַרויס „לאָמיר אַרויסגיין‟, די זעכצנטע לעקציע אין דער סעריע, און ס׳זענען לעצטנס אויך אַרויסגעקומען צוויי נײַע לעקציעס „מיר זוכן און זיי זוכן‟ און „פֿון וועמען איז עס.‟

אין דער לעקציע „מיר זוכן און זיי זוכן‟ גייען די העלדן פֿון דער סעריע, דאָס מיידעלע נעמי און איר חבֿר דער ראָבאָט „מאָבי‟, אויף אַ שפּאַציר אין וואַלד כּדי צו געפֿינען פֿייגעלעך. אָבער אַנשטאָט פֿייגעלעך זעען זיי אַ וועווריק, אַ מויז, אַ פֿוקס און סוף־כּל־סוף, ווי אַרויסגעשפּרונגען פֿון אַ פֿאָלקס־לעגענדע, אַ פּאַווע. נאָך די אַלע ווערטער פֿאַרבונדן מיט וועלדער, בעלי־חיים און דער נאַטור, קנעלט אײַן די לעקציע די אונטערשיידן צווישן פֿאַרשידענע נאָמינאַטיווע און אַקוזאַטיווע פּראָנאָמען ווי, למשל, „מיר‟ קעגן „מיך‟, און „זי‟ קעגן „איר‟.

אין דער אַכצנטער לעקציע „פֿון וועמען איז עס?‟ איז נעמי פֿאַרטיפֿט אינעם לייענען אַ בוך פֿון שערלאָק האָלמס (אויף ייִדיש, פֿאַרשטייט זיך) ווען מאָבי פֿרעגט וועגן וואָס זי לייענט. נאָך דעם וואָס זי דערקלערט אַז די מעשׂה האַנדלט זיך אין אַ מיסטעריע, באַווײַזט זיך פּלוצלעם אַ מתּנה פֿאַר נעמי. „פֿון וועמען איז עס?‟ פֿרעגט זי און הייבט אָן אויסצורעכענען די מענטשן, וואָס האָבן איר אפֿשר געשאָנקען דעם פּרעזענט. נעמי און מאָבי ווערן אַליין אַ מין שערלאָק האָלמס און וואַטסאָן בעת זיי פּרובירן צו דערלייזן די מיסטעריע פֿון דער מתּנהס ייִחוס. דורך זייער אויספֿאָרשונג לערנט „ייִדישפּאָפּ‟ ווערטער וואָס זענען פֿאַרבונדן מיט דער היים, דעם דימוניטיוו „ל‟ (זייגער קעגן זייגערל), און די ווערטער „פֿאַר וואָס‟ און „ווײַל‟. די לעקציע לערנט אויך די פּראָנאָמען וואָס קומען נאָך אַ פּרעפּאָזיציע.

אַזוי ווי אַלע קאַפּיטלען פֿון „ייִדישפּאָפּ‟, וואָס ווערט אונטערגעשטיצט דורך דער „נעמי־פֿונדאַציע‟, צייכענען זיך אויס די לעקציעס מיט זייער הומאָר. מאָבי פֿאַרמאָגט אַ מאָל די פֿיזישע געוווינהייטן פֿון אַ טאַלאַנטירטן פֿיזישן קאָמעדיאַנט אַזוי ווי טשאַרלי טשאַפּלין און אַ סך פֿון די קאָמישסטע מאָמענטן קומען פֿאָר אָן קיין שום דערקלערונגען, אַזוי ווי אין די סקיצן פֿונעם אַמאָליקן ייִדישן וואָדעוויל אָדער די Three Stooges. אַזוי אַרום איז „ייִדישפּאָפּ‟ מצליח צו האַלטן דעם אויפֿמערק ניט בלויז פֿון קינדער, נאָר אויך פֿון די דערוואַקסענע, וואָס לערנען זיך באַנאַנד מיט זיי.