ליד פֿון אַנאַ פֿראַנק וועט ליציטירט ווערן

Poem by Anne Frank Up For Auction

Getty Images

פֿון „פֿאָרווערטס‟־רעדאַקציע

Published November 23, 2016, issue of November 23, 2016.

אַ כּתבֿ־יד פֿון אַ ליד, וואָס אַנאַ פֿראַנק האָט אָנגעשריבן פֿאַר דער שוועסטער פֿון אַ חבֿרטע, וועט אין גיכן ליציטירט ווערן.

דעם מאַנוסקריפּט וועט מען ליציטירן בײַ דער „באָב קײַפּער־ליציטיר־פֿירמע‟ אינעם מערבֿ־האָלענדישן שטעטל האַאַרלעם.

מע ריכט זיך אַז דאָס ליד פֿון אַכט שורות, וואָס עס האָט מחבר געווען די באַקאַנטע טאָגבוך־פֿירערין, וועט מען פֿאַרקויפֿן פֿאַר מער ווי דעם מינימאַלן אָנבאָט פֿון 32,000 דאָלאַר.

דאָס ליד, אָנגעשריבן אויף האָלענדיש מיט שוואַרצן טינט אויף אַ פֿאַרגעלטן שטיקל פּּאַפּיר, האָט די דעדיקירט „קרי־קרי‟, דעם שוועסטערל פֿון אַנאַ פֿראַנקס שול־חבֿרטע זשאַקלין פֿאַן מאַרסען. דאָס ליד איז דאַטירט דעם 28סטן מאַרץ 1942, דרײַ חדשים איידער אַנאַ פֿראַנק און אירע קרובֿים האָבן זיך אויסבאַהאַלטן פֿון די נאַציס אויף אַן אַמסטערדאַמער בוידעם ווען פֿראַנק איז געווען 12 יאָר אַלט.

קריסטיאַן „קרי־קרי‟ פֿאַן מאַרסען איז געשטאָרבן מיט צען יאָר צוריק. זשאַקלין פֿאַן מאַרסען פֿאַרמאָגט נאָך אַ ליד אין אַ „חבֿרשאַפֿט־בוך‟, וואָס אַנאַ פֿראַנק האָט עס איר דעדיקירט. דאָס וויל זי אָבער ניט פֿאַרקויפֿן.

אין 1988 האָט מען פֿאַרקויפֿט פֿאַר 165,000 דאָלאַר עטלעכע בריוו וואָס אַנאַ פֿראַנק און איר שוועסטער מאַרגאָ האָבן געשיקט זייערע אַמעריקאַנער פֿעדערפֿרײַנד.