ידיעות פֿון מעלבורן

News From Melbourne


פֿון שׂרה זילבערמאַן

Published December 06, 2016, issue of December 28, 2016.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

די לערערין רײזל איז געבױרן געװאָרן אין אױסטראַליע אין 1989. זי איז אַ גראַדויִרטע לערערין פֿון ייִדישער שפּראַך און ייִדישע שטודיעס, װאָס לערנט מיט פֿאָלקשול־ און מיטלשול־תּלמידים בײַם „שלום עליכם קאָלעדזש‟ אין מעלבורן, אױסטראַליע. בײדע שװעסטער אירע זײַנען אױך ייִדיש־לערער, איר מאַמע איז אַ ייִדיש־לערער און די באָבע אירע איז אױך געװען אַ ייִדיש־לערער. איר טאַטע זיצט אױף דער פֿאַרװאַלטונג פֿון כּמעט יעדער ייִדישיסטישער אָרגאָניזאַציע אין אױסטראַליע. רײזל איז אַ פֿאַרברענטע אָנהענגערין פֿון דער אױסטראַלישער װערסיע פֿון פֿוסבאַל.

רײזל האָט גראַדויִרט פֿונעם „שלום עליכם קאָלעדזש‟ אין מעלבורן צו 12 יאָר. זי האָט זיך ווײַטער געלערנט ייִדיש נאָך די שול־שעהען אין דער „דוד המלך מיטלשול‟ און איז געװען אינעם ערשטן קלאַס װאָס האָט געמאַכט די שטאַטישע ייִדיש־עקזאַמענס — אונטער דער אָנפֿירערשאַפֿט פֿונעם לערער אַלעקס דאַפֿנער. הײַנט לערנט זי ייִדיש מיט מיטלשול־תּלמידים בײַם „שלום עליכם קאָלעדזש‟ נאָך די שול־שעהען און גרײט זײ צו צו די שטאַטישע ייִדיש־עקזאַמענס. זי לערנט אױך אַ װעלטלעכן בר/בת־מצװה פּראָגראַם בײַ דער „שלום עליכם קאָלעדזש‟ אַחוץ איר אַרבעט װי אַ פֿאָלקשול־לערערין פֿון ייִדיש און ייִדישע שטודיעס.

רײזל איז געװען אַן אַקטיװער מיטגליד פֿון דער אײנציקער ייִדישער יוגנט־גרופּע אין אױסטראַליע װאָס פֿאַרנעמט זיך מיט ייִדיש — דער סקיף. װען זי איז אַרײַן אין אוניװערסיטעט איז זי אױך געװאָרן אַ סקיף העלפֿער און האָט אַפֿילו געדינט עטלעכע יאָר װי אײנער פֿון די צװײ פֿאָרזיצערס װעלכע פֿירן אָן מיט דער אָרגאָניזאַציע. הײַנט דינט זי אױף אַ קאָמיטעט װאָס העלפֿט די הײַנטיקע העלפֿערס און פֿאָרזיצערס. אַחוץ דעם איז זי אַ מיטגליד פֿונעם מעלבורנער בונד־קאָמיטעט און פֿון דער אָרגאָניזאַציע „ייִדיש אױסטראַליע‟, װאָס פֿירט אָן מיטן יערלעכן „סוף־װאָך אױסטראַליע‟ און אַנדערע אונטערנעמונגען. דערצו פֿירט זי אָן מיטן ייִדישן כאָר „מיר קומען אָן‟.

נאָר רײזל האָט זײער ליב, װי מיר האָבן שױן געזאָגט, די אױסטראַלישע װערסיע פֿון פֿוסבאַל. זי האָט ליב צו גײן אױף פֿוסבאַל־שפּילן און קוקן פֿוסבאַל אױף טעלעװיזיע. זי איז אַ גרױסער אונטערשטיצער פֿון די פּראָפֿעסיאָנעלע פֿרױען פֿוסבאַל־שפּילער, װעלכע װעלן האָבן זײער ערשטן אָפֿיציעלן סעזאָן אין 2017. זי דינט שױן עטלעכע יאָר װי אַן עטנישער אַמבאַסאַדאָר פֿון דער אױסטראַלישער פֿוסבאַל ליגע. דאָס דערלױבט איר צו באַקענען תּלמידים און תּלמידות אין ייִדישע טאָגשולן מיטן אױסטראַלישן פֿוסבאַל און צו באַקענען די װעלט פֿון פֿוסבאַל מיט דער ייִדישער באַפֿעלקערונג פֿון מעלבורן און אירע טראַדיציעס. די לעצטע צװײ יאָר האָט רײזל פֿרײַװיליק אָרגאָניזירט די שפּילן פֿאַרן ייִדישן טאָגשול־בעכער בײַ דער אױסטראַלישער פֿוסבאַל ליגע. דאָס דערלױבט ייִדישע קינדער פֿון ייִדישע פֿאָלקשולן (אַפֿילו די פֿרומע) צו שפּילן אױף אַ פּראָפֿעסיאָנעל פֿוסבאַל־אָרט. דערפֿאַר האָט די אױסטראַלישע פֿוסבאַל־ליגע זי אַנערקענט װי איר מולטי־קולטורעלער קינדערשולן־אַמבאַסאַדאָר פֿונעם יאָר 2016.

אין 2016, איז לערערין רײזל צום ערשטן מאָל געװאָרן אַ מיטגליד פֿון דער ייִדישער פֿרױען־פֿוסבאַל־מאַנשאַפֿט בײַ דער ייִדישער ספּאָרט־אָרגאָניזאַציע „אײדזשעקס־מכּבי‟ — די „דזשעקעטס“. זי איז געגאַנגען אױף אַרבעט־סעסיעס צװײ מאָל אַ װאָך און האָט געשפּילט אין די סופֿװאָכן.

רעדנדיק װעגן איר אַרבעט װי דער ערשטער עטנישער פֿוסבאַל־אַמבאַסאַדאָר בײַ ייִדן, האָט די לערערין רײזל געזאָגט: „מײַן לעבן איז שטענדיק געװען עטװאָס צעטײלט צװישן מײַן ייִדישן אידענטיטעט און מײַן ליבע צו פֿוסבאַל. די ראָלע איז מיר װיכטיק װײַל זי ברענגט צוזאַמען די צװײ װיכטיקע באַשטאַנדטײלן פֿון מײַן לעבן. איך האַלט אַז מע דאַרף בױען אױפֿן געמיינזאַמען, בעת מע שטיצט אונטער אונדזערע פֿאַרשײדנאַרטיקע אידענטיטעטן. לױט מיר איז די צווישן־קולטורעלע פּראָגראַם בײַ דער אױסטראַלישער פֿוסבאַל ליגע אַ װוּנדערלעכער בײַשפּיל דערפֿון.‟