דײַטשער פֿאָרשער פֿון ייִדיש, וואָלטער רעל, איז געשטאָרבן

German Researcher of Yiddish, Walter Röll, Has Passed Away


פֿון „פֿאָרווערטס‟־רעדאַקציע

Published December 30, 2016, issue of December 28, 2016.

ד״ר וואָלטער רעל, אַ ספּעציאַליסט פֿון דער מיטלעלטערלעכער דײַטשער שפּראַך און ליטעראַטור, וועלכער האָט געשפּילט אַ וויכטיקע ראָלע אויפֿן געביט פֿון ייִדיש אין דײַטשלאַנד נאָך דער צווייטער וועלט־מלחמה, איז די וואָך געשטאָרבן, האָט געמאָלדן זײַן קאָלעגע, ד״ר מאַריאָן אַפּטרוט, אַ ייִדיש־פּראָפֿעסאָר בײַם דיסלדאָרפֿער אוניווערסיטעט.

וואָלטער רעל איז יאָרן לאַנג געווען אַ פּראָפֿעסאָר בײַם טריִער אוניווערסיטעט, דײַטשלאַנד און האָט געהאָלפֿן דאָרט גרינדן אַ קאַטעדרע פֿון ייִדיש־שטודיעס. ווי דער דעקאַן פֿון דער קונסט־פֿאַקולטעט האָט ער אויך איבערצײַגט דעם אוניווערסיטעט צו געבן דעם ייִדישן לינגוויסט שלמה בירנבוים אַן ערן־דאָקטאָראַט אין ייִדישער שפּראַכפֿאָרשונג אין 1986.

דורך זײַן אַרבעט און איבערגעגעבנקייט צום שטח פֿון ייִדיש־פֿאָרשונג, האָט פּראָפֿ׳ רעל אינספּירירט אַ ריי אַנדערע אַקאַדעמיקער צו שטודירן און ווערן ספּעציאַליסטן אין דער ייִדישער שפּראַך און ליטעראַטור. איינער פֿון זײַנע באַקאַנטסטע סטודענטן איז עריקאַ טים — אַ דײַטשע ליגוויסטין און מחברטע פֿון אָנגעזעענע ווערק וועגן דער געשיכטע פֿון דער ייִדישער לינגוויסטיק און פֿילאָלאָגיע.

רעל האָט אַרויסגעגעבן אַ לאַנגע ריי אַרטיקלען וועגן דער אַלטער ייִדישער שפּראַך און ליטעראַטור. אין איינעם מיט ד״ר שמעון נויבערג, פּראָפֿעסאָר פֿון ייִדיש־שטודיעס (אָדער ווי מע רופֿט עס אויף דײַטש — Jiddistik), האָט ער צונויפֿגעשטעלט אַ זאַמלונג עסייען א״ט „ייִדישע פֿילאָלאָגיע: פֿעסטשריפֿט פֿאַר עריקאַ טים‟ (1999). צווישן די עסייען אין דעם בוך: „מיידלעך אין דער אַלט־ייִדישער ליטעראַטור‟ פֿון חווה טורניאַנסקי; „וועלטסווערטלעך פֿון דער פֿריִער ייִדישער ליטעראַטור‟ פֿון ראָבערט ג. וואַרנאָק, און אַ באַזונדערע קאָלעקציע עסייען וועגן דער פֿאָנעטיק פֿון דער ייִדישער שפּראַך, פֿון אַנע קלײַן.



Would you like to receive updates about new stories?








You may also be interested in our English-language newsletters:















We will not share your e-mail address or other personal information.

Already subscribed? Manage your subscription.