געוועזענע קאַצעטלערין, 91, פּראַוועט איר בת־מצווה

Auschwitz Survivor, 91, Celebrates Her Bat Mitzvah

יוגעניע אונגער לייענט פֿון דער תּורה אויף איר בת־מצוויה
Facebook
יוגעניע אונגער לייענט פֿון דער תּורה אויף איר בת־מצוויה

פֿון ייִט״אַ

Published April 05, 2017, issue of April 27, 2017.

יוגעניע אונגער, וואָס דערלאָזט געוויינטלעך, אַז מע זאָל זען די נומערן וואָס זענען טאַטויִרט אויף איר אָרעם, האָט זיי דאָס מאָל באַהאַלטן מיט אירע שבתדיקע קליידער און טלית. די סיבה — זי האָט געפּראַוועט איר בת־מצווה.

די 91־יאָריקע וואַרשע־געבוירענע, וואָס האָט איבערגעלעבט די אומברענג־לאַגערן מײַדאַנעק און אוישוויץ און רעדט אָפֿט וועגן אירע איבערלעבונגען בײַם בוענאָס־אײַרעסער חורבן־מוזיי, און אין די שולן, האָט מען שבת גערופֿן צו דער תּורה בײַם „הרצליה ייִדישן קהילה־צענטער‟.

דינסטיק האָט זי דערציילט דער אַרגענטינער ראַדיאָ־פּראָגראַם „ראַדיאָ קולטוראַ‟, אַז די שׂימחה איז פֿאַר איר „דער הויכפּונקט פֿון מײַן גאַנץ לעבן. ס׳איז אַ ריטואַל וואָס איז זייער וויכטיק אינעם ייִדישן לעבן.‟

איר שיל האָט אויך אָרגאַניזירט אַ געבוירן־טאָג־שׂימחה פֿאַר איר.

אונגער (פֿון דער היים יוגעניע רויטשטיין), איז ווי אַ צענערלינג פֿאַרשפּאַרט געוואָרן אינעם וואַרשעווער געטאָ און איז שפּעטער פֿאַרשיקט געוואָרן אין צוויי טויטלאַגערן צוזאַמען מיט אירע עלטערן, צווי ברידער און שוועסטער. אונגער איז די איינציקע פֿון איר משפּחה וואָס האָט איבערגעלעבט דעם חורבן. ווען די סאָוועטן האָבן זי באַפֿרײַט האָט זי געווויגן ווייניקער ווי 59 פֿונט.

נאָך אַ רײַזע איבער צענטראַל־אייראָפּע האָט זי געוווינט צוויי יאָר אין אַ „די־פּי‟־לאַגער אין מאָדענאַ, איטאַליע, וווּ זי האָט זיך געטראָפֿן מיט איר מאַן, דוד אונגער. זיי האָבן זיך באַזעצט אין אַרגענטינע אין 1949.

אונגער האָט צוויי זין און זעקס אייניקלעך און איז די מחברטע פֿון דרײַ ביכער זכרונות. אין 2011 האָט די בוענאָס־אײַרעסער שטאָטראָט זי באַצייכנט ווי „אַן אויסערגעוויינטלעכע פּערזענלעכקייט‟ אין דער אַרגענטינער הויפּטשטאָט.



Would you like to receive updates about new stories?






















We will not share your e-mail address or other personal information.

Already subscribed? Manage your subscription.