„טעאָדאָר ביקעל: אין די שיך פֿון שלום־עליכמען‟ איצט אויף די־ווי־די

"Theodore Bikel: In the Shoes of Sholem Aleichem" Now on DVD

פֿון „פֿאָרווערטס‟־רעדאַקציע

Published June 04, 2017, issue of June 29, 2017.

Theodore Bikel: In the Shoes of Sholom Aleichem (Trailer) from National Center for Jewish Film on Vimeo.

אַ דאָקומענטאַר־פֿילם, וואָס וועבט צונויף דאָס לעבן פֿון שלום־עליכם מיט טעאָדאָר ביקעל — דער אַקטיאָר וואָס האָט במשך פֿון 50 יאָר געשפּילט די ראָלע פֿון שלום־עליכמס באַרימטסטען העלד, טבֿיה דער מילכיקער — איז איצט אַרויסגעלאָזט געוואָרן ווי אַ די־ווי־די.

די פּרעמיערע פֿונעם אָריגינעלן פֿילם, אין דער לעצטער נאַכט פֿון דער ערשטער „קולטורפֿעסט‟, דעם 21סטן יוני 2015, איז פֿאָרגעקומען איין חודש איידער ביקעל איז אַוועק אין דער אייביקייט. אויף דער פּרעמיערע האָט ביקעל געפֿירט אַ שמועס מיט זײַן לאַנגיאָריקן חבֿר, דעם באַרימטן אַקטיאָר אַלען אַלדאַ.

כאָטש ס׳איז געווען אַלעמען קלאָר אַז ביקעל האָט דעמאָלט שוין געליטן פֿון שווערע געזונט־פּראָבלעמען, האָט ער במשך פֿון איבער אַ שעה פֿאַרכּישופֿט דעם עולם, ווי אויך אַלען אַלדאַ, מיט זײַנע זכרונות, אַנעקדאָטן און וויצן. שפּעטער אין אָוונט, איז ביקעל אויפֿגעטראָטן מיט צוויי לידער אויף אַ קבלת־פּנים לכּבֿוד אים. ס׳איז, צום באַדויערן, געווען זײַן לעצטער אויפֿטריט זינגענדיק פֿאַר אַ גרויסן עולם.

אינעם פֿילם ווערן ביקעלס זכרונות צונויפֿגעוועבט מיט אויפֿטריטן, אין וועלכע דער אַקטיאָר שטעלט פֿאָר סצענעס פֿון שלום־עליכמס ווערק. דער פֿילם, מיט נאַראַציע פֿון אַלען אַלדאַ, נעמט אויך אַרײַן אינטערוויוען מיט אַ ריי באַרימטע פּערזענלעכקייטן, אַרײַנגערעכנט די שרײַבערין (און אייניקל פֿון שלום־עליכמען) בעל קאַופֿמאַן, דעם אַקטיאָר און קאָמיקער פֿײַוויש פֿינקעל, דער סצענאַריסט שעלדאָן האַרניק („פֿידלער אויפֿן דאַך‟), דער אַקטיאָר אַלען לויִס ריקמאַן, דער שרײַבער מײַקל וועקס, דער ביאָגראַף פֿון שלום־עליכם ד׳׳ר דזשערעמי דאַובער, ווי אויך אָריגינעלע מוזיק פֿון האַנקוס נעצקי.

צוויי יאָר נאָכן דעביוט פֿונעם פֿילם האָט דער „נאַציאָנאַלער צענטער פֿאַרן ייִדישן פֿילם‟ בײַם „בראַנדײַס־אוניווערסיטעט‟ לעצטנס געלאָזט וויסן, אַז מע קען שוין קויפֿן אַ „די־ווי־די‟ פֿון אים.

נאָך אינפֿאָרמאַציע באַזוכט: http://www.jewishfilm.org/Catalogue/films/theodorebikel.htm.



Would you like to receive updates about new stories?






















We will not share your e-mail address or other personal information.

Already subscribed? Manage your subscription.