סמאַרטפֿאָן ווידעאָ־רעקלאַמע אויף ייִדיש

Video: Yiddish Ad for Samsung's Galaxy S8

פֿון דזשאָרדין קוציק

Published June 07, 2017, issue of June 29, 2017.

היסטאָריש גערעדט האָבן די זעלטענע טעלעוויזיע־רעקלאַמעס אויף ייִדיש אין ישׂראל אויסגענוצט די שפּראַך אויף אַ ניט־ערנסטן אופֿן. ייִדיש האָבן די „מאַרקעטינג‟־גאונים גיכער באַטראַכט ווי אַ וויץ איידער אַ מיטל דורך וועלכן מע קען דערגרייכן פּאָטענציעלע קונים.

מיטן צוּוווּקס פֿון דער חרדישער באַפֿעלקערונג אויף דער אינטערנעץ, און אויך אַ דאַנק דער אַנטוויקלונג פֿון נײַע טעכנאָלאָגיעס וואָס דערמעגלעכן, אַז רעקלאַמעס זאָלן דערגרייכן ספּעציפֿישע גרופּעס צוקוקער, זעט מען אָבער הײַנט ערנסטע רעקלאַמעס אויף ייִדיש. אין די דאָזיקע רעקלאַמעס ווערט ייִדיש ניט פֿאָרגעשטעלט ווי אַ וויץ אָדער עפּעס פֿאַרבונדן מיט דער פֿאַרגאַנגענהייט, נאָר ווי אַ לעבעדיקער טייל פֿון דער ישׂראלדיקער געזעלשאַפֿט.

לעצטנס האָט די ישׂראלדיקע טעלעפֿאָן־פֿירמע „עסקן‟, וואָס ספּעציאַליזירט זיך מיט די „כּשרע‟ סמאַרטפֿאָנען, אַרויסגעלאָזט אַ ייִדיש־שפּראַכיקע רעקלאַמע פֿאַר איר נײַעם, כּשרן „סאַמסונג־גאַלאַקסי עס 8‟. אין דער רעקלאַמע שרײַט אַ היימישער פֿיש־הענדלער (געשפּילט דורכן באַרימטן קלעזמער־מוזיקער אַבֿרהם־לייב בורשטיין) אויף אַ קונה, וואָס באַנוצט זיך מיטן „עסקן‟־טעלעפֿאָן, מחמת ער וויל ניט אַז מע זאָל ניצן קיין טרייפֿענע סמאַרטפֿאָנען אין זײַן געשעפֿט. אַ צווייטער ייִד דערקלערט, אַז אַלצדינג איז כּשר־ויושר — דער טעלעפֿאָן איז דאָך פֿון „עסקן‟, וועמענס עמבלעם דינט בײַ זיי ווי אַ מין הכשר.

פֿון דער פּראָפֿעסיאָנעלער רעקלאַמע, וואָס איז געצילעוועט דווקא ניט בלויז אויף ייִדיש־רעדנדיקע חרדים, נאָר אויפֿן ברייטן העברעיִש־רעדנדיקן עולם בכלל, זעט מען אַז געוויסע „מאַרקעטינג‟־גאונים האַלטן הײַנט ייִדיש פֿאַר „קיל‟. דער פֿאַקט וואָס בײַ די חרדים אין ישׂראל ווערט ייִדיש אויך אָפֿט באַטראַכט ווי עפּעס וואָס געהערט צו די סאַמע־פֿרימסטע קרײַזן הייסט אַז די רעקלאַמע וויל ווײַזן, אַז דער „עסקן‟־טעלעפֿאָן איז כּשר אַפֿילו בײַ די פֿרימסטע קרײַזן, ניט געקוקט אויף דעם, וואָס ער זעט אויס פּונקט ווי די מאָדישע „ניט־כּשרע‟ „אַנדרויד‟־טעלעפֿאָנען.



Would you like to receive updates about new stories?








You may also be interested in our English-language newsletters:















We will not share your e-mail address or other personal information.

Already subscribed? Manage your subscription.