מאָנטי האָל ז״ל געדענקט ייִדיש אין האָליוווּד

The Late Monty Hall on Speaking Yiddish in Hollywood

פֿון „פֿאָרווערטס‟־רעדאַקציע

Published October 03, 2017, issue of October 27, 2017.

די וואָך איז אַוועק אין דער אייביקייט די באַרימטע טעלעוויזיע־פּערזענלעכקייט, אַקטיאָר און קאָמיקער מאָנטי האָל, וואָס איז געווען באַקאַנט ווי דער ערשטער אָנפֿירער פֿון דער פּראָגראַם Let‘s Make a Deal (לאָמיר מאַכן אַ געשעפֿט). אַחוץ זײַן קאַריערע אויף דער טעלעוויזיע איז האָל געווען ברייט באַקאַנט אין האָליוווּד ווי איינער פֿון די גרעסטע בעל־נדבֿות; ער האָט געהאָלפֿן שאַפֿן מער ווי 1 ביליאָן דאָלאַר פֿאַר פֿאַרשידענע וווילטעטיקע צוועקן.

צווישן די זאַכן וואָס זענען געווען האָל נאָענט צום האַרצן איז געווען זײַן מאַמע־לשון ייִדיש. אין אַן אינטערוויו מיט קריסטאַ וויטני, וואָס זי האָט געהאַלטן מיט אים ווי אַ טייל פֿונעם פּראָיעקט פֿון געשיכטע בעל־פּה בײַם „ייִדישן ביכער־צענטער‟ אין אַמהערסט, מאַסאַטשוסעטס, דערציילט דער קאָמיקער אַז ער האָט שטאַרק ליב געהאַט צו רעדן אויף ייִדיש מיט אַנדערע באַרימטע האָליוווּדער פּערזענלעכקייטן, צווישן זיי — דעני קיי (פֿון דער היים: דוד קאַמינסקי) און דער באַרימטער אירלענדיש־אַמעריקאַנער אַקטיאָר דזשיימס קעגני.

אין נאָך אַן אויסצוג פֿונעם אינטערוויו דערקלערט האָל פֿאַר וואָס ער האַלט אַז ייִדיש איז וויכטיק פֿאַרן ייִדישן קיום.

אין נאָך צוויי רירנדיקע אויסצוגן, דערציילט ער ווי ער האָט באַגלייט זײַן עלטער־זיידע אין שיל אין וויניפּעג און וועגן זײַן מאַמע, אַן אַקטריסע אינעם ייִדישן טעאַטער און אַ טוערין אין „הדסה‟, וועמען ער באַשרײַבט ווי אַ געמיש פֿון מאָלי פּיקאָן און גאָלדע מאיר.



Would you like to receive updates about new stories?








You may also be interested in our English-language newsletters:















We will not share your e-mail address or other personal information.

Already subscribed? Manage your subscription.