דנעפּראָפּעטראָווסק, אוקראַיִנע. — עטלעכע הונדערט ייִדן זענען אַרויסגעקומען אין די גרויסע פֿרעסט די וואָך, כּדי צו באַקומען שפּײַזפּעקלעך פֿאַר זייערע משפּחות אין דער באַלאַגערטער שטאָט לוגאַנסק.
בערך 300 מענטשן זענען געשטאַנען מער ווי אַ שעה לאַנג פֿאַר דער לוגאַנסקער שיל, וואַרנטנדיק אויף די פּעקלעך, האָט איבערגעגעבן דער אָרטיקער רבֿ און חב״ד־שליח, שלום גראָפּין.
„דער פֿאַקט וואָס אַזוי פֿיל ייִדן זענען געקומען צו אונדז, נישט געקוקט אויף דער ביטערער קעלט, איז אַ סימן פֿון די שטײַגנדיקע באַדערפֿענישן בײַ די ייִדן דאָ,‟ האָט גאָפּין געזאָגט דער ייִט״אַ. ס׳רובֿ פֿון זיי האָבן נישט קיין מיטלען ווי צו פֿאַרדינען, ווײַל ס׳איז דאָ ממש אַ מלחמה־זאָנע, מיט בלויז טייל־צײַטיקער עלעקטריע.‟
לוגאַנסק, וווּ עס וווינען בערך 2,000 ייִדן, געפֿינט זיך איצט אונטערן קאָנטראָל פֿון די פּראָ־רוסישע מיליטאַנטן, וועלכע קעמפֿן קעגן די סאָלדאַטן פֿון דער אוקראַיִנער רעגירונג. זינט מאַרץ זענען הונדערטער קעמפֿער און ציווילע לײַט שוין אומגעקומען אין די קאַמפֿן. לויט די נײַעס־באַריכטן, האָבן די מיליטאַנטן לעצטנס מסכּים געווען אויף אַ פֿײַער־איבעררײַס, אָבער דערווײַל שלאָגט מען זיך ווײַטער.
„דאָס איז געווען דאָס ערשטע מאָל, וואָס איך האָב געזען ווי מענטשן קריגן זיך און שטופּן זיך אויף די רייען, וואַרטנדיק אויף די שפּײַזפּעקלעך,‟ האָט גאָפּין געזאָגט. „עס ווײַזט דעם ייִאוש בײַ די ייִדן דאָ.‟
די שפּײַזפּעקלעך זענען געקומען דורך פֿאָנדן פֿון דער „אינטערנאַציאָנאַלער ברודערשאַפֿט פֿון קריסטן און ייִדן‟.
במשך פֿון די קאַמפֿן, פֿונקציאָנירט די שיל ווײַטער, אָבער זינט דער ווינטער איז אָנגעקומען, זענען עטלעכע פֿון די קהילה־וואָלונטירן קראַנק געוואָרן, און דערפֿאַר איז שווערער געוואָרן צו אָרגאַניזירן דאָס אויסטיילן עסן.
פֿון דעסטוועגן, האָבן אַ טייל ייִדן זיך לעצטנס אומגעקערט קיין לוגאַנסק, נאָכן אַנטלאָפֿן צו די פּליטים־לאַגערן אין יולי. „ס׳איז זיי שוין נימאס געוואָרן צו לעבן ווי פּליטים, האָבן זיי באַשלאָסן צו ריזיקירן, און אַהיימקומען,‟ האָט גאָפּין דערקלערט.
ס׳רובֿ פֿון די הײַזער אין לוגאַנסק זענען לעצטנס ווידער פֿאַרבונדן געוואָרן מיט דער עלעקטראָ־סטאַנציע, אָבער די שיל האָט נאָך אַלץ נישט קיין עלעקרטיע אָדער באַהייצונג, אַחוץ דער באַהייצונג וואָס זי באַקומט פֿון אַ גענעראַטאָר.
The Yiddish Daily Forward welcomes reader comments in order to promote thoughtful discussion on issues of importance to the Jewish community. In the interest of maintaining a civil forum, The Yiddish Daily Forwardrequires that all commenters be appropriately respectful toward our writers, other commenters and the subjects of the articles. Vigorous debate and reasoned critique are welcome; name-calling and personal invective are not. While we generally do not seek to edit or actively moderate comments, our spam filter prevents most links and certain key words from being posted and The Yiddish Daily Forward reserves the right to remove comments for any reason.