98־יעריקע פֿרוי ווערט אַ ייִדישע טאָכטער

98-Year-Old Woman Converts to Judaism

Facebook

פֿון אַרי פֿעלדמאַן (Forward)

Published June 27, 2017, issue of June 29, 2017.

פֿראַנסעס בערטעטאַ, אַן 98־יעריקע פֿרוי פֿון דער סאַן־פֿראַנציסקער געגנט, האָט באַוויזן אַז אויף צו ווערן אַ ייִד איז מען קיין מאָל נישט צו אַלט — בפֿרט ווען עס שפּילט צו אַ ביסעלע מזל.

בערטעטאַ, אַן אָפּשטאַמיקע פֿון אַ פּויליש־קאַטולישער משפּחה מיטן נאָמען קאַוואַלקאָווסקי, איז צוגעצויגן געוואָרן צו ייִדישקייט נאָך מיט 70 יאָר צוריק, ווען זי איז בײַגעווען אויף דער בר־מיצווה פֿון איר חבֿרטעס אַ זון. איר ליבשאַפֿט צום ייִדישן גלויבן האָט זיך אויף ס׳נײַ צעפֿלאַקערט מיט דרײַ יאָר צוריק, ווען זי האָט — דורך אַ פּלעט פֿונעם אָרטיקן ייִדישן קאָמונאַלן צענטער — געוווּנען בילעטן אויף די ימים־נוראָים אין אַ סאַן־פֿראַנציסקער שיל. נאָך דעם איז זי געוואָרן אַן אָפֿטער גאַסט אין דער שיל און האָט אָנגעהויבן אויף איר דרך צום ווערן אַ ייִדישע טאָכטער.

„כ׳געדענק ביזן הײַנטיקן טאָג ווי דאָס ייִנגעלע האָט געדאַוונט אויף לשון־קודש“, האָט זי איבערגעגעבן דער צײַטונג Jewish News of Northern California (ייִדישע נײַעס פֿון צפֿון־קאַליפֿאָרניע). „די קאַטוילישע קירך איז אַ קאַלטע וווּ מע טאָר נישט פֿרעגן קיין קשיות. מיר קינדער האָבן תּמיד געציטערט פֿאַר די גלחים און מאָנאַשקעס. און דאָ זע איך ווי דער רבֿ גייט אַרום און כאַפּט אַ פֿרײַנדלעכן שמועס מיט יעדן איינעם“.

כאָטש זי האָט זיך שוין אָפֿיציעל מגייר געווען, לערנט זי זיך ווײַטער וועגן דער ייִדישער טראַדיציע און געשיכטע.

„וואָס מער איך לערן זיך, אַלץ מער האָב איך עס ליב,‟ האָט בערטעטאַ געזאָגט. „דאָס שווערסטע איז געווען דאָס לערנען זיך לשון־קודש. און איך האָב ליב די כּסדרדיקע דיסקוסיעס. בײַ ייִדן מעג מען אַלץ דיסקוטירן.‟