נײַער חסידישער פּאָדקאַסט אויף ייִדיש וועגן וויסנשאַפֿט און פּאָליטיק

New Hasidic Podcast in Yiddish on Politics and Science

פֿון „פֿאָרווערטס‟־רעדאַקציע

Published May 22, 2019.
אַ בילד פֿון אַ קינסטלער פֿון אַ ווײַטן פּלאַנעט וואָס הייסט „פּראָקסימאַ ב”
Getty Images
אַ בילד פֿון אַ קינסטלער פֿון אַ ווײַטן פּלאַנעט וואָס הייסט „פּראָקסימאַ ב”

אין צוזאַמענהאַנג מיטן זשורנאַל „די געמײנדע‟ האָט מען לעצטנס לאַנצירט אַ פּאָדקאַסט, וואָס דערקלערט פּרטימדיק פֿאַרשידענע טעמעס. אינעם פּאָדקאַסט „אַ טראָפּ טיפֿער‟ דיסקוטירט מען לשמל וועגן דער וואַל־סיסטעם אין ישׂראל, דעם מצבֿ אין ווענעזועלע, דער אַמעריקאַנער געזונט־סיסטעם און „מאָדנע פּלאַנעטן‟, דאָס הייסט, „פּלאַנעטן וווּ עס רעגענען שטיינער, בושעווען גלעזערנע שטורעמס, ….און אַ וועלט וווּ עס וואַלגערן זיך דימענטן אין די גאַסן.‟

עס פֿירט אָן מיט דער פּראָגראַם דער חסידישער זשורנאַליסט פּנחס גלויבער.

עס זענען שוין לאַנג פֿאַראַן אַ ריי פּראָגראַמען אויף ייִדיש בײַ די חסידים, אָבער זיי הערט מען טעלעפֿאָניש. „קול מבֿשׂר‟ (1100־444־212), וואָס עקסיסטירט שוין 15 יאָר, לאָזט אַרויס פֿאַרשידענע באַריכטן וועגן פּאָליטיק, געזונט, מוזיק, עקאָנאָמיק און פּסיכאָלאָגיע. עס טרעטן דאָרטן אויף באַקאַנטע חסידישע זשורנאַליסטן און עסקנים, אַרײַנגערעכנט זלמן ווידער, הערשל מייזלס, וועלוול שמעלצער און יוסף ראַפּאַפּאָרט.

אַחוץ „קול מבֿשׂר‟ זענען אויך דאָ אַנדערע פּראָגראַמען, וואָס מע קען הערן טעלעפֿאָניש, געווידמעט אַלערײ טעמעס, אַרײַנגערעכנט געזונט־פּראָבלעמען, פֿינאַנציעלע עצות, נײַעסן פֿאַרבונדן מיט פֿאַרשידענע רביים, און דער סדרה פֿון דער וואָך.

די דאָזיקע פּראָגראַמען, וואָס ווערן טראַנסמיטירט דורכן טעלעפֿאָן, האָבן זיך אָנגעהויבן צוליב דעם וואָס די פֿרימסטע צוהערער האָבן ביז לעצטנס ניט געהאַט קיין ראַדיאָס, אָדער געוואָלט אַן אַלטערנאַטיוו דערצו. הײַנט האָבן אָבער אַ סך חסידים צוטריט צו דער אינטערנעץ בײַ זיך אין דער היים אָדער אויף זייערע טעלעפֿאָנען. ס׳איז אַ סוד פֿאַר גאַנץ בראָד, אַז די הויפּט־זשורנאַליסטן אויף „קול מבֿשׂר‟ און אַ סך שרײַבער פֿאַר די פֿרומע זשורנאַלן אויף ייִדיש, זענען אַליין אַקטיוו אויף „פֿייסבוק‟ און „טוויטער‟.

מיט צען יאָר צוריק איז נאָך געווען אַ טאַבו דאָס צו דערמאָנען, אָבער הײַנט שיקט אַפֿילו „דער איד‟ אַרויס אַ טעגלעכן נײַעס־בולעטין אָנלײַן. צוליב דער פֿאַרשפּרייטונג פֿון דער אינטערנעץ בײַ די חסידים זענען אויך אויפֿגעקומען נײַע וועבזײַטן אויף מאַמע־לשון. „אידיש ווינקל‟, למשל, איז אַ רעלאַטיוו נײַע וועבזײַט וואָס גיט איבער פֿאַרשידענע באַריכטן און אַנאַליזן אויף ייִדיש. און די נײַעס־אַגענטור JPNews שיקט אַרויס סײַ אַ טעגלעכן נײַעס־בולעטין אויף ייִדיש און ענגליש, סײַ אַ זשורנאַל „די געמיינדע‟, רעדאַקטירט פֿון יוסף ראַפּאַפּאָרט, וואָס פּראָדוצירט דעם נײַעם פּאָדקאַסט „אַ טראָפּ טיפֿער‟.