ייִדישע פֿילמען און רעפֿעראַטן אין שיקאַגע

Yiddish Films and Lectures in Chicago


Published June 28, 2019.

במשך פֿון די לעצטע פּאָר יאָר האָט זיך שטאַרק צעוואַקסן די צאָל ייִדיש־אַקטיוויטעטן אין שיקאַגע.

דער אָרטיקער צווײַג פֿונעם ייִוואָ, בשותּפֿות מיטן אַרבעטער־רינג און אַ גרופּע יונגע ייִדישיסטן, אַרבעטן אײַנצואָרדענען רעגלמעסיקע קולטורעלע פּראָגראַמען, לעקציעס און שפּראַכקלאַסן. כאָטש די שפּראַכקלאַסן וועלן זיך ווידער אָנהייבן ערשט נאָך די ימים־נוראים, וועט מען במשך פֿונעם זומער דורכפֿירן אין און אַרום שיקאַגע אַ ריי לעקציעס, פֿילמווײַזונגען און קאָנצערטן פֿאַרבונדן מיט ייִדיש. אָט איז אַן אויסקלײַב דערפֿון:

דינסטיק, דעם 16טן יולי, 2 אַ זייגער נאָכמיטאָג וועט מען ווײַזן דעם דאָקומענטאַר־פֿילם „דער לעצטער קלעזמער‟, וואָס שילדערט דאָס לעבן פֿונעם קלעזמער־מוזיקער און קאָמפּאָזיטאָר לעאָפּאָלד קאָזלאָווסקי ז׳׳ל. דער פּראָדוצענט פֿונעם פֿילם בערנאַרד בערקין וועט אויך רעדן וועגן דעם פֿילם. די פּראָגראַם וועט פֿאָרקומען אין דער עפֿנטלעכער ביבליאָטעק פֿון סקאָקי, אילינוי.

מיטוואָך, דעם 17טן יולי, 2 אַ זייגער נאָכמיטאָג וועט מען אין מאָרטאָן־גראָוו, אילינוי ווײַזן דעם דאָקומענטאַר־פֿילם „טעאָדאָר ביקעל, אין די דרכים פֿון שלום־עליכם‟. דער פֿילם שילדערט ווי ביקעלס לעבן איז משפּיע געוואָרן פֿונעם ייִדישן קלאַסיקער און ווי ער האָט געשטרעבט צו פֿאַראייביקן זײַן אָנדענק. די פּראָגראַם וועט פֿאָרקומען בײַ דער עפֿנטלעכער ביבליאָטעק פֿון מאָרטאָן־גראָוו.

שבת, דעם דריטן אויגוסט, 7 אַ זייגער אין אָוונט, וועלן די מעלבורנער ייִדיש־לערערינס דבֿורה און רייזל זילבערמאַן האַלטן אַ רעפֿעראַט וועגן דעם, ווי אַזוי די פּעדאַגאָגישע פֿילאָסאָפֿיע פֿון דער „צישאָ‟־באַוועגונג ווירקט הײַנט אויף דער „שלום־עליכם־שול‟ אין מעלבורן. מע האָט נאָך ניט באַשטימט, וווּ די פּראָגראַם וועט פֿאָרקומען.

נאָך מער פּרטים קוועטשט דאָ