„מטרונית‟-אויטאָבוסן

Metronit Buses Roll Out in Haifa

אַ רעקלאַמע פֿון דער אויטאָבוס-סיסטעם „מטרונית‟
Wikimedia Commons
אַ רעקלאַמע פֿון דער אויטאָבוס-סיסטעם „מטרונית‟

Published July 26, 2013, issue of August 16, 2013.

זינאַ רויטמאַן, אַן עצה-געבערין בײַם ישׂראלדיקן טראַנספּאָרט-מיניסטעריום, האָט איבערגעגעבן, אַז פֿונעם 2טן אויגוסט וועט זיך אין חיפֿה און דער חיפֿהר געגנט בײַטן די סיסטעם פֿון אויטאָבוסן. מע פּלאַנירט אײַנצופֿירן 90 אויטאָבוסן פֿון דער נײַער סיסטעם „מטרונית‟, וועלכע וועלן פֿאָרן איבער אַלע 143 סטאַנציעס אויפֿן שטח פֿון חיפֿה און די אַרומיקע שטעטלעך.

חיפֿה איז די ערשטע שטאָט אין ישׂראל, וווּ עס וועט באַלד אָנהייבן צו אַרבעטן די נײַע סיסטעם פֿון לאַנגע און גיכע אויטאָבוסן מיט דרײַ פּאַסאַזשיר-סעקציעס. אין יעדן אויטאָבוס קאָנען פֿאָרן 150 פּאַסאַזשירן, וועלכע קויפֿן פֿון פֿריִער די בילעטן דורך ספּעציעלע עלעקטראָנישע סיסטעמען. די אויטאָבוסן פֿאָרן אויף ספּעציעלע וועג-פּאַסן און שפּאָרן אָפּ די צײַט בײַ די גאַס-סיגנאַלן; מע קאָן אַרײַנקומען און אַרויסקומען דורך יעדער טיר. די עלעקטראָנישע בילעטן ווערן קאָנטראָלירט אויטאָמאַטיש, אָן דעם שאָפֿער.

ישׂראל כּ״ץ, דער טראַנספּאָרט-מיניסטער האָט באַמערקט, אַז מיט דער סיסטעם „מטרונית‟ וועט אין ישׂראל זיך אָנהייבן אַ גאַנצע „טראַנספּאָרט-רעוואָלוציע‟. לויט כּ״צן, וועט „מטרונית‟ שטאַרק פֿאַרבעסערן דעם מצבֿ אינעם צפֿונדיקן ראַיאָן פֿונעם לאַנד. צוליב די דערמאָנטע מעלות, קאָנען אַזעלכע אויטאָבוס פֿאָרן אַ סך גיכער. אויף די סטאַנציעס זענען אינסטאַלירט געוואָרן עלעקטראָנישע פּאַנעלן, וועלכע ווײַזן אָן, ווען עס וועט אָנקומען דער קומענדיקער אויטאָבוס. דער הויפּט-מאַרשרוט פֿון דער סיסטעם „מטרונית‟ — צווישן דעם כּרמלער ברעג און די שטעטלעך אַרום חיפֿה (הקריות) — וועט אַרבעטן אַ גאַנצן מעת-לעת, זיבן טעג אַ וואָך, און וועט אויסמײַדן די ראַיאָנען, וווּ דער פֿרומער עולם היט שבת.