וואַרשעווער אויפֿשטאַנד

Film of the Warsaw Uprising


פֿון ייִט״אַ

Published August 22, 2013, issue of September 13, 2013.

די היסטאָרישע שוואַרץ־און־ווײַסע פֿילם־מאַעריאַלן פֿונעם וואַרשעווער אויפֿשטאַנד קעגן די נאַציס אין 1944 זענען לעצטנס פֿאַרוואַנדלט געוואָרן אין אַ לעבעדיקן פֿילם, באַגלייט מיט מוזיק און קאָליר, האָט די וואָך איבערגעגעבן די „דיילי מייל‟.

דער פֿילם, וואָס הייסט Warsaw Rising, איז איבערגעמאַכט געוואָרן דורכן Warsaw Rising Museum, און וועט געוויזן ווערן איבעראַיאָר אין די קינאָס איבער פּוילן און אין אויסלאַנד, כּדי אָפּצומערקן דאָס 70סטע יאָר פֿונעם אויפֿשטאַנד.

די קאַמפֿן אין די גאַסן זענען פֿילמירט געוואָרן דורך קאַמערע־לײַט, וואָס די פּוילישע פּאַרטיזאַנער פֿון דער „היים־אַרמיי‟ האָבן בכּיוון געהאַט געשיקט איבער דער שטאָט, כּדי צו פֿאַראייביקן דעם אויפֿשטאַנד, וואָס האָט זיך אָנגעהויבן דעם 1טן אויגוסט און זיך געענדיקט מיט 63 טעג שפּעטער. בערך 200,000 אויפֿשטענדלער און אײַנוווינער פֿון דער פּוילישער קרוינשטאָט זענען אומגעקומען במשך פֿונעם אויפֿשטאַנד.

דער איינציקער פֿיקטיווער עלעמענט פֿונעם פֿילם איז אַ נײַ־געשאַפֿענע נאַראַציע, פֿון צוויי כּלומרשטיקע ברידער, וועלכע דערקלערן די געשעענישן, וואָס קומען פֿאָר פֿאַר זייערע אויגן, אַרײַנגערעכנט אַ גאָרקיך און עפּיזאָדן פֿון פֿאַרטיליקונג.

דערווײַל האָט דער מוזיי אַרויפֿגעשטעלט אַ פֿראַגמענט פֿונעם פֿילם אויף זײַן וועבזײַט, כּדי צו העלפֿן די פֿאָרשער אידענטיפֿיצירן די מענטשן אינעם פֿילם. אַ טייל פֿון זיי האָט מען שוין טאַקע געפֿונען.