ווירטועלער ייִדישער טעאַטער

Virtual Jewish Theater

אַ בילד פֿון דער נײַער ווירטועלער אויסשטעלונג
אַ בילד פֿון דער נײַער ווירטועלער אויסשטעלונג

פֿון ייִט״אַ

Published October 06, 2013, issue of October 25, 2013.

דער מאָסקווער גרויסער נײַער „ייִדישער מוזיי און צענטער פֿון טאָלעראַנץ‟, בשותּפֿות מיט דער קאָמפּיוטער־פֿירמע „גוגל‟, האָט געעפֿנט אַ ווירטועלע אויסשטעלונג, געווימדעט דעם ייִדישן טעאַטער אין רוסלאַנד. די פֿאַרגאַנגענע וואָך האָט די פֿירמע געעפֿנט אַ ספּעציעל וועבזײַטל אויף ענגליש פֿאַר דער אויסשטעלונג, ווי אַ טייל פֿונעם קונסט־פּראָיעקט „היסטאָרישע מײַלשטיינער‟, אָנגעפֿירט דורכן „גוגל‟:

//www.google.com/culturalinstitute/collection/jewish-museum-and-tolerance-center

לויט דער רוסישער צײַטונג „קאָמערסאַנט‟, איז דער מאָסקווער „ייִדישער מוזיי און צענטער פֿון טאָלעראַנץ‟, וועלכער האָט זיך געעפֿנט אין נאָוועמבער 2012, געוואָרן די זעקסטע קולטור־אָרגאַניזאַציע אין רוסלאַנד, וואָס עפֿנט אַזאַ פּראָיעקט בשותּפֿות מיט דער ריזיקער קאָרפּאָראַציע פֿאַר אינטערנעץ־אויפֿזוך.

פּיטער אַדאַמטשיק, וועלכער פֿירט אָן מיט די „גוגל‟־פּראָגראַמען אין דרום־מיזרחדיקער אייראָפּע, האָט געזאָגט, אַז דער פּראָיעקט וועט דינען ווי אַ דיאַלאָג „צווישן אונדזערע קינדער, אונדזערע זיידע־באָבעס און זייערע עלטערן‟. אויפֿן וועבזײַטל זענען אַרויסגעשטעלט פֿאָטאָגראַפֿיעס, פּלאַקאַטן, טעאַטער־פּראָגראַמען, ווי אויך ליטעראַטור־ווערק אויף ייִדיש און העברעיִש, וואָס דערציילן וועגן דעם מאָסקווער ייִדישן טעאַטעראַל לעבן.

לויט דער אינטערנעץ־אויסשטעלונג, האָט די געשיכטע פֿונעם פּראָפֿעסיאָנעלן ייִדישן טעאַטער אין רוסלאַנד זיך אָנגעהויבן מיט 146 יאָר צוריק, ווען אין אָקטאָבער 1867 האָט מען אין אַ צאָל מאָסקווער טעאַטערס געשפּילט אויף ייִדיש די קאָמעדיעס פֿונעם באַרימטן דראַמאַטורג אַבֿרהם גאָלדפֿאַדען, וועלכער איז געשטאָרבן אין ניו־יאָרק אינעם יאָר 1908.

דער נײַער מאָסקווער ייִדישער מוזיי, וועלכער האָט זיך געעפֿנט ווייניקער ווי מיט אַ יאָר צוריק, האָט אָפּגעקאָסט בערך 50 מיליאָן דאָלאַר. אין אַפּריל האָט די רוסישע ווערסיע פֿון דער פּרעסטיזשפֿולער לאָנדאָנער קונסט־צײַטונג „The Art‟ אים באַטיטלט ווי „דעם מוזיי פֿונעם יאָר‟. דער רעלאַטיוו־נײַער „קולטור־אינסטיטוט‟ בײַם „גוגל‟ האָט זיך געעפֿנט אינעם יאָר 2011.