דרײַ צה״ל־סאָלדאַטן האָבן זיך גענומען דאָס לעבן

3 Soldiers Commit Suicide After Gaza War

Getty Images

פֿון גילי כּהן (Forward)

Published October 02, 2014, issue of October 24, 2014.

דרײַ ישׂראלדיקע סאָלדאַטן, וועלכע האָבן זיך באַטייליקט דעם לעצטן זומער אין דער עזה־מלחמה, האָבן במשך פֿונעם פֿאַרגאַנגענעם חודש זיך גענומען דאָס לעבן. אַחוץ דעם, האָט אַ רעזערוויסט, וועלכן מע האָט אַרויסגערופֿן אין דער אַרמיי בעת דער מלחמה, האָט געטאָן דאָס זעלבע מיט אַרום צוויי חדשים צוריק.

מאָנטיק, דעם 29סטן סעפּטעמבער, האָט די נײַעס־וועבזײַט NRG איבערגעגעבן, אַז אַלע דרײַ אומגעקומענע האָבן געדינט אין דער בריגאַדע „גבֿעתי‟. יעדעס מאָל, ווען אַ סאָלדאַט שטאַרבט נישט אויפֿן שלאַכט־פֿעלד, נאָר צוליב וועלכער־ניט־איז אַנדער סיבה, הייבט די מיליטערישע פּאָליציי אָן אַן אויספֿאָרשונג. אויב מע באַשטעטיקט, אַז דער אומגעקומענער האָט זיך גענומען דאָס לעבן, דערקלערן די צה״ל־אינסטאַנצן, אין זייערע אָפֿיציעלער טערמינאָלאָגיע, אַז דאָס איז געווען אַ „וואַרשײַנלעכער זעלבסטמאָרד‟.

אין אַלע דרײַ פֿאַלן האָט מען געפֿונען די סאָלדאַטן מיט זייער געווער; לויט אַלע סימנים, האָבן זיי זיך דערשאָסן. איינער פֿון די אומגעקומענע איז געווען דוד גאָרדאָן — אַן עלנטער אַמעריקאַנער, וועלכער איז אַוועקגעפֿאָרן קיין ישׂראל אַליין, אָן זײַן משפּחה. נאָך צוויי טעג זוכענישן, האָט די פּאָליציי געפֿונען דעם פֿאַרשוווּנדענעם; זײַן ביקס איז געלעגן בײַ זײַן טויטן גוף.

מיט אַ חודש צוריק, האָט די צײַטונג „האָרץ‟ איבערגעגעבן, אַז איבער 100 סאָלדאַטן האָבן זיך געווענדט נאָך דער מלחמה צו מילטערישע פּסיכיאַטערס, וועלכע האָבן אויך דורכגעפֿירט אַ שמועס מיט גאַנצע אַרמיי־טיילן — בפֿרט מיט די סאָלדאַטן פֿון דער בריגאַדע „גבֿעתי‟, וועלכע האָבן געפֿירט אַ שווערע שלאַכט אינעם עזה־ראַיאָן שודזשאַיִע.

במשך פֿונעם יאָר 2013, האָבן זיבן ישׂראלדיקע מיליטער־לײַט זיך גענומען דאָס לעבן, אַרײַנגערעכנט אַ מאַיאָר. די צה״ל־אינסטאַנצן האָבן דעמאָלט באַטאָנט, אַז זיי האָבן נישט באַמערקט קיין פֿאַרבינדונגען צווישן זייער אַרמיי־דינסט און די זעלבסט־מאָרדן. פֿונדעסטוועגן, ווי די מיליטערישע קוואַלן האָבן צוגעגעבן, איז די סטאַטיסטיק פֿון אַזעלכע אומגליקן דווקא געפֿאַלן הײַיאָר ביז אַ רעקאָרד־נידעריקער ציפֿער, ווײַל מע האָט אײַנגעפֿירט שטרענגערע רעגולאַציעס, וואָס שייך דעם צוטריט צום געווער, ווי אויך אַ ריי אַנדערע ספּעציעלע מאָסמיטלען, כּדי אָפּצושטעלן אַזעלכע פֿאַלן.