די פּאָפּולערסטע ייִדישע נעמען פֿון קינדער אין 2015

Most Popular Jewish Baby Names for 2015


פֿון דער „פֿאָרווערטס‟־רעדאַקציע

Published May 22, 2015, issue of June 12, 2015.

אין דער רשימה פֿון די פּאָפּולערסטע נעמען פֿון אַמעריקאַנער קינדער (ייִדן און נישט־ייִדן) פֿאַרן יאָר 2015, זענען 25 פֿון די ערשטע 80 ערטער דווקא געווען ייִדישע און תּנכישע נעמען, גיט איבער אַ באַריכט פֿון Kveller.

מער ייִנגלעך ווי מיידלעך האָבן באַקומען ביבלישע נעמען, און דער נאָמען Noah (נח) האָט פֿיגורירט אויפֿן צווייטן אָרט פֿון אַלע ייִנגל־נעמען אין אַמעריקע. אויפֿן ערשטן אָרט האָט פֿיגורירט Liam, אַן אירלענדישער נוסח פֿון William.

בײַ ייִדן זענען די פּאָפּולערסטע ייִדישע און ביבלישע נעמען פֿאַר ייִנגלעך געווען נח, יעקבֿ, איתן, דניאל און כּלב. בײַ מיידלעך איז דער פֿאַרשפּרייטסטער ייִדישער/ביבלישער נאָמען געווען Anna, אַ נוסח פֿון חנה. אויפֿן צווייטן אָרט: אַבֿיגיל, און אויפֿן דריטן אָרט — חנה.

פֿאַר עלטערן, וואָס זוכן אַליין אַ ייִדישן נאָמען פֿאַר זייער נײַ־געבוירן קינד, גיט די וועבזײַט //www.kveller.com/baby-name-finder/ אָן אַ שיעור מעגלעכקייטן. אויב די עלטערן ווילן אָפּגעבן כּבֿוד אַ פֿאַרשטאָרבענעם קרובֿ, אָבער זײַן/איר נאָמען קלינגט זיי צו פֿרעמד אָדער אַלט־מאָדיש, קענען זיי דאָ געפֿינען אַ רשימה פּאָפּולערע ייִדישע נעמען, וואָס הייבן זיך אָן מיטן זעלבן אות.

די וועבזײַט לייגט אויך פֿאָר נעמען לויט געוויסע קאַטעגאָריעס. למשל, טאָמער זוכט מען אַ נאָמען, וואָס איז טײַטש אַ מין איידלשטיין, לייגט עס פֿאָר: זהבֿה אָדער פּערל. אויב מע זוכט אַ נאָמען, וואָס באַטײַט „שלום‟ אָדער „טרייסט‟, רעכנט עס אויס: נחמן, רוחמה אָדער ירחמיאל.

מע קען אויך געפֿינען אינפֿאָרמאַציע וועגן די נעמען גופֿא. למשל, פֿאַרן נאָמען „גרשון‟ שטייט ווי אַזוי מע שרײַבט עס אויף לשון־קודש (באַגלייט מיט די ניקודות), און די דערקלערונג: „גרשום שטאַמט פֿונעם וואָרט ׳גר׳, פֿרעמדער. גרשון איז געווען דער זון פֿון משה רבינו און ציפּורה, און דערמאָנט די געשיכטע פֿון בני־ישׂראל, ווען זיי האָבן געוואַנדערט אין מידבר נאָך יציאת־מצרים‟.