אָסקאַר פֿאַר „שינדלערס ליסטע‟ געשאָנקען צו יד־ושם

Oscar for "Schindler‘s List" Donated to Yad Vashem

פֿון „פֿאָרווערטס‟־רעדאַקציע

Published July 08, 2015, issue of July 24, 2015.

בראַנקאָ לוסטיג, אַ פּראָדוצענט פֿון „שינדלערס ליסטע‟, זאָגט, אַז יד־ושם איז דאָס פּאַסיקסטע אָרט פֿאַרן אָסקאַר, וואָס דער פֿילם האָט געוווּנען אין 1993
בראַנקאָ לוסטיג, אַ פּראָדוצענט פֿון „שינדלערס ליסטע‟, זאָגט, אַז יד־ושם איז דאָס פּאַסיקסטע אָרט פֿאַרן אָסקאַר, וואָס דער פֿילם האָט געוווּנען אין 1993

ירושלים. — אַ קראָאַטישער לעבן געבליבענער פֿון חורבן, וועלכער האָט געאַרבעט ווי אַ פּראָדוצענט פֿון סטיווען ספּילבערגס פֿילם „שינדלערס ליסטע‟ (1993), וועט שענקען זײַן אָסקאַר פֿונעם פֿילם צו יד־ושם.

דער פֿילם שילדערט דאָס לעבן פֿונעם דײַטשן פֿאַבריקאַנט, אָסקאַר שינדלער, וואָס האָט געראַטעוועט הונדערטער ייִדן פֿון די נאַציס.

בראַנקאָ לוסטיג, אַ 83־יאָריקער ייִד, וואָס האָט דורכגעמאַכט אוישוויץ און בערגען־בעלזען, האָט געזאָגט, אַז דער מוזיי אין יד־ושם אין ירושלים „איז דאָס אָרט, וווּ די פּרעמיע דאַרף זיך געפֿינען נאָך מײַן טויט,‟ האָט מאָנטיק איבערגעגעבן די ישׂראלדיקע אינטערנעץ־צײַטונג Ynet. לויט די באַריכטן איז לוסטיג נישט אין קיין גוטן געזונט־צושטאַנד.

לוסטיג וועט אָפֿיציעל איבערגעבן די סטאַטוע בעת אַ צערעמאָניע לכּבֿוד אים, וואָס דאַרף פֿאָרקומען אין ירושלים אין אויגוסט. די קראָאַטישע פּרעזידענטין קאָלינדאַ גראַבער־קיטאַראָוויטש, וואָס האָט סײַ־ווי פּלאַנירט דעמאָלט צו באַזוכן ישׂראל, האָט געזאָגט, אַז זי וועט בײַזײַן בײַ דער אונטערנעמונג, גיט איבער Ynet.

יד־ושם זאָגט, אַז מע וועט אַרויסשטעלן דעם אָסקאַר אינעם „וויזועלן צענטער‟ פֿונעם מוזיי.

לוסטיג איז געבוירן געוואָרן אין 1932 בײַ סעקולערע ייִדישע עלטערן אין אָסייִעק, יוגאָסלאַוויע. זײַן טאַטע איז געווען דער הויפּט־קעלנער פֿון „אָסייִעק קאַפֿע צענטראַלע‟. לוסטיגס באָבע־זיידע זענען געווען פֿרומע ייִדן, און ווי אַ קינד פֿלעגט ער אָפֿט דאַווענען מיט זיי אין דער אָרטיקער שיל.

לוסטיגס מאַמע האָט איבערגעלעבט דעם חורבן, אָבער ס׳רובֿ פֿון די קרובֿים זענען דערהרגעט געוואָרן אין די נאַציסטישע אומברענג־לאַגערן.

לוסטיג האָט געוווּנען אַ צווייטן אָסקאַר ווי אַ פּראָדוצענט פֿונעם פֿילם Gladiator, פֿונעם יאָר 2001.