אַן אומגעריכטער קול־קורא פֿון חרדישע רבנים

Unexpected Proclamation From Haredi Rabbis

דער קול־קורא און צוויי פֿון די אָנגעזעענע חתומים: הרבֿ פּרץ שטיינבערג, אַ דיין אינעם „אַגודת־ישׂראל‟ בית־דין אין קיו־גאַרדען הילס, נ״י, און הרבֿ שמואל פֿוערסט, אַ דיין אינעם „אַגודת־ישׂראל‟ בית־דין אין שיקאַגע
דער קול־קורא און צוויי פֿון די אָנגעזעענע חתומים: הרבֿ פּרץ שטיינבערג, אַ דיין אינעם „אַגודת־ישׂראל‟ בית־דין אין קיו־גאַרדען הילס, נ״י, און הרבֿ שמואל פֿוערסט, אַ דיין אינעם „אַגודת־ישׂראל‟ בית־דין אין שיקאַגע

פֿון דער „פֿאָרווערטס‟־רעדאַקציע

Published August 25, 2015, issue of September 18, 2015.

מער ווי 100 חרדישע רבנים און לערער אין די פֿאַראייניקטע שטאַטן האָבן אונטערגעשריבן אַ קול־קורא, אַז לויטן דין מוזן אַלע ייִדן זיך ווענדן צו דער פּאָליציי, אויב זיי זענען חושד, אַז אַ קינד איז סעקסועל באַלעסטיקט געוואָרן.

„אויב מע גיט נישט איבער דער פּאָליציי וועגן די פֿאַלן, קאָן עס קאַליע מאַכן אַ לעבן און אַפֿילו דערפֿירן צו זעלבסטמאָרד — אַ טראַגעדיע, וואָס מיר האָבן שוין צו אָפֿט אַליין געזען,‟ שטייט אין דער דעקלאַראַציע.

דער קול־קורא האָט ציטירט דעם פּסוק — „לא תַעֲמד עַל דַּם רֵעֶךָ, זאָלסט נישט שטײן רויִק בײַ דעם בלוט פֿון דײַן חבֿר‟ — ווי דער מקור פֿון דער מיצווה בײַ יעדן ייִד איבערצוגעבן די אינסטאַנצן וועגן דער סעקסועלער באַלעסטיקונג פֿון קינדער.

אין אַ באַריכט וועגן דעם קול־קורא, האָט אָבער דער בלאָג FailedMessiah מאָנטיק געשריבן, אַז ס׳רובֿ פֿון די 107 חתומים זענען נישט קיין הויך־ראַנגיקע רבנים; אַז קיין איין פֿירנדיקער חסידישער רבי אָדער מיטגליד פֿון די גדולי־התורה פֿון „אַגודת־ישׂראל‟ האָט עס נישט אונטערגעשריבן, און אַז אין ס׳רובֿ חרדישע צײַטשריפֿטן האָט מען בכלל נישט דערמאָנט דעם קול־קורא.

„איין גוטע זאַך פֿון דעם נײַעם קול־קורא איז, וואָס די באַקאַנטע חרדישע רבנים זענען געווען גרייט צוצוגעבן זייער חתימה אונטער אַ דערקלערונג, מיט וועלכער זייערע פֿירער זענען נישט מסכּים,‟ האָט Failed Messiah באַמערקט.