אַמעריקאַנער אַמבאַסאַדאָרין דערציילט סוצקעווערס געשיכטע

U.S. Ambassador Tells Sutzkever's Story

פֿון „פֿאָרווערטס‟־רעדאַקציע

Published May 08, 2016, issue of May 27, 2016.

די אַמעריקאַנער אַמבאַסאַדאָרין צו דער „יו־ען‟, סאַמאַנטאַ פּאַוער, האָט דעם 4טן מײַ גערעדט (דורך ווידעאָ) פֿאַר די יונגע באַטייליקטע אינעם „לעבן־מאַרש‟ וועגן די שרעקלעכע חורבן־איבערלעבונגען פֿונעם גרויסן ייִדישן פּאָעט אַבֿרהם סוצקעווער.

צוזאַמען מיט טויזנטער אַנדערע ווילנער ייִדן, איז סוצקעווערס אייגן קינד אומגעקומען אין דער ווילנער געטאָ. וועגן דעם מאָרד פֿון זײַן מאַמען האָט ער זיך שפּעטער דערוווּסט, ווען ער האָט געפֿונען אירע שיך אין אַ וואָגן מיט שיך, וואָס די נאַציס האָבן „געשאָנקען‟ דער געטאָ. וועגן דעם האָט ער אויך אָנגעשריבן דאָס באַקאַנט ליד „אַ וואָגן שיך‟, וואָס פּאַוער האָט פֿאָרגעלייענט אַן אויסצוג דערפֿון פֿאַר די יוגנטלעכע.

זי האָט אויך דערציילט וועגן סוצקעווערס וויכטיקער ראָלע ווי אַן עדות פֿאַרן נירנבערגער טריבונאַל, וואָס האָט נאָך דער מלחמה פֿאַרמישפּט אַ צאָל נאַצי־פֿירער. דורכן איבערדערציילן די געשיכטעס פֿון סוצקעווער און פֿון אַנדערע לעבן־געבליבענע, זאָגט פּאַוערס, קען מען העלפֿן צו פֿאַרזיכערן, אַז קיין גענאָיד אַזאַ זאָל מער ניט פֿאָרקומען אויף דער וועלט.

סאַמאַנטאַ פּאַוער איז אַליין ניט קיין ייִדישע, נאָר אַ געבוירענע אין אירלאַנד, וואָס האָט זיך קונה־שם געווען ווי אַ פּראָפֿעסאָרין אין האַרוואַרד און אַ וויכטיקע שטיצערין פֿון באַראַק אָבאַמאַ, נאָך איידער ער איז געוואָרן דער פּרעזידענט. אין 2008 האָט זי חתונה געהאַט מיטן ייִד קעס סאָנסטין (Sunstein), אויך אַ פּראָפֿעסאָר פֿון יוריספּרודענץ, נאָך דעם ווי זיי האָבן זיך באַקענט אין דער קאַמפּאַניע פֿאַר אָבאַמאַ. ניט געקוקט אויף איר האַלב־ייִדישער משפּחה, האָט זי ניט באַוויזן ריכטיק אַרויסצורעדן סוצקעווערס נאָמען, וואָס זי רופֿט אים „אייברעהעם סאַסקעווער‟.