זעקס ייִדישע פֿיגורן ווערן טייל פֿון בראָנקסער כּבֿוד־גאַלעריע

Six People Inducted into Bronx Jewish Hall of Fame


פֿון „פֿאָרווערטס‟־רעדאַקציע

Published May 15, 2016, issue of May 27, 2016.

ווי אַ טייל פֿון איר אָנגייענדיקער קאַמפּאַניע מפֿרסם צו זײַן דעם ייִדישן ייִחוס פֿונעם ניו־יאָרקער באָראָ — בראָנקס, האָט די „איניציאַטיוו פֿון דער בראָנקסער ייִדישער געשיכטע‟ געמאָלדן די נעמען פֿון זעקס בראָנקס־געבוירענע יחידים, וועלכע וועלן הײַיאָר אַרײַנגענומען ווערן אין דער „בראָנקסער כּבֿוד־גאַלעריע‟.

די צערעמאָניע וועט פֿאָרקומען דאָנערשטיק, דעם 2טן יוני, 5:30 אין אָוונט, אינעם „בראָנקסער קונסט־מוזיי‟, אויפֿן גרענד קאָנקאָרס אין 165סטער גאַס.

איינער פֿון די זעקס יחידים, וואָס מע האָט הײַיאָר אויסגעקליבן, איז דער ייִדישער אַקטיאָר אַבֿי האָפֿמאַן, וועלכער איז לעצטנס נאָמינירט געוואָרן פֿאַר אַ „דראַמאַ־דעסק‟ פּרעמיע פֿאַר זײַן ראָלע אין דער פּיעסע „טויט פֿון אַ סיילסמאַן‟. די אַנדערע באַערטע זענען עזרא לעווין, אַן אַדוואָקאַט וואָס איז געווען אַקטיוו אין דער „ניו־יאָרקער קאָאַליציע פֿאַר סאָוועטישע ייִדן‟ און אין מענטשנרעכט־טעטיקייטן לטובֿת גלײַכע רעכט פֿאַר אַפֿראָ־אַמעריקאַנער; די קלאַרנעטיסטין און פֿאָטאָגראַפֿין אַרלין אָלדאַ, וואָס אירע בילדער זענען אָפּגעדרוקט געוואָרן אין אַ צאָל ביכער, צײַטונגען און זשורנאַלן; לויד אולטאַן, דער מחבר פֿון עטלעכע ביכער וועגן דער געשיכטע פֿון בראָנקס, מיט פּרעכטיקע פֿאָטאָגראַפֿיעס פֿון די „אַלטע גוטע צײַטן‟; און לינדאַ קאַפּלאַן טאַלער, אַ רעקלאַמע־שרײַבערין, וואָס האָט אויסגעטראַכט אַ פּאָר פֿון די באַקאַנטסטע טעלעוויזיע־רעקלאַמעס, ווי, למשל, די קאַטשקע וואָס קוואָקעט לטובֿת דער פֿאַרזיכערונג־פֿירמע „אַפֿלאַק‟.

דאָס איז דאָס צווייטע יאָר זינט דער גרינדונג פֿון דער „בראָנקסער כּבֿוד־גאַלעריע‟. צווישן די געווינער פֿון 2015, זענען געווען דער קאָמיקער ראָבערט קלײַן; בלט גרינבערג — די קעמפֿערין פֿאַר אַ גרעסערער ראָלע פֿאַר פֿרויען בײַם דאַווענען אין די אָרטאָדאָקסישע שילן, און דער ניו־יאָרקער גענעראַל־פּראָקוראָר, ראָבערט אייבראַמס.