קאַלענדאַר געווידמעט דער ייִדישער פּאָעזיע

Calendar of Yiddish Poetry


פֿון „פֿאָרווערטס‟־רעדאַקציע

Published May 24, 2016, issue of May 27, 2016.

בני מער, אַ יונגער ישׂראלדיקער פֿאָרשער פֿון דער ייִדישער ליטעראַטור, און אַ באַגאַבטער איבערזעצער פֿון דער ייִדישער פּאָעזיע אויף עבֿרית, האָט לעצטנס פֿאַרעפֿנטלעכט אַ קאַלענדאַר געווידמעט ייִדישע פּאָעטן.

דער קאַלענדאַר פֿון יאָר תּשע״ז (פֿון אָקטאָבער 2016 ביז סעפּטעמבער 2017 לויט דער גוייִשער צײַט־רעכענונג) שטעלט צו פֿאַר יעדן חודש אַ פּאָרטרעט פֿון אַ ייִדישן פּאָעט (פֿונעם קינסטלער מיכל אריאלי), אַ קליינע ביאָגראַפֿיע פֿונעם דיכטער אויף העברעיִש און אַ פּאָר שורות פֿון זײַנס אָדער אירס אַ ליד, סײַ אויף ייִדיש, סײַ אין בני מערס העברעיִשער איבערזעצונג.

דעם קאַלענדאַר האָט מען צוגעטיילט בײַ דער קאָנפֿערענץ געווידמעט שלום־עליכם אין ישׂראל. דער פּראָיעקט האָט אונטערגעשטיצט „די נאַציאָנאַלע אינסטאַנץ פֿאַר ייִדישער קולטור‟ און איז אַ פּראָדוקט פֿון דער פֿירמע „בום‟, אָנגעפֿירט פֿון בני מער און מיכל אריאלי, וואָס צילעוועט צונויפֿצובינדן קינסטלערישע בילדער מיט פּאָעזיע.

די פּאָעטן, וואָס געפֿינען זיך אינעם קאַלענדאַר, אײַנגעסדרט לויטן חודש פֿון זייער געבורט, זענען לייב נײַדוס, משה בראָדערזאָן, ציליע דראָפּקין, אַנאַ מאַרגאָלין, רבֿקה באַסמאַן בן־חיים, א. לעיעלעס, אַבֿרהם רייזען, קאַדיע מאָלאָדאָווקסקי, יוסף פּאַפּיערניקאָוו, אַבֿרהם סוצקעווער, אַלכּסנדר שפּיגלבלאַט און יהואש. ס׳רובֿ אויסצוגן פֿון די לידער שילדערן די נאַטירלעכע וועלט אָבער אַ פּאָר פֿון זיי באַהאַנדלען שווערע טעמעס ווי פּאָליטיק, ליבע און עלנטקייט.

כּדי צו באַקומען נאָך אינפֿאָרמאַציע וועגן דעם קאַלענדאַר באַזוכט: https://www.facebook.com/boomamood.