פּלאַן אַנטפּלעקט צו בויען ריזיקע שיל אין באָראָ־פּאַרק

Plans Unveiled to Build Huge Synagogue in Borough Park

Karl Fischer

פֿון „פֿאָרווערטס‟־רעדאַקציע

Published October 07, 2016, issue of October 26, 2016.

אַ ברייט ליידיק אָרט אויף 52סטער גאַס אין באָראָ־פּאַרק, ברוקלין, וועט אין אַ יאָר אַרום אפֿשר ווערן די „היים‟ פֿון אַ ריזיקער סינאַגאָגע, גיט איבער דער ייִדישער מעדיאַ־קוואַל „וואָס איז נײַעס‟.

די שיל „קהילת היכל התּפֿילה‟, אָנגעפֿירט פֿון הרבֿ בנימין אײַזנבערגער, האָט די וואָך געמאָלדן, אַז איר פֿאַרוואַלטונג פּלאַנירט צו בויען אַ בנין מיט אַ גרייס פֿון איבער 93,000 קוואַדראַטפֿוס, אויפֿן אַדרעס פֿון 1772 52סטער גאַס, וואָס וועט גרייכן פֿון אַלט־נײַ אולטרעכט עוועניו ביז דער 18טער עוועניו.

דער זעקס־שטאָקיקער בנין, וואָס איז אויספּלאַנירט געוואָרן פֿונעם אָנגעזעענעם אַרכיטעקט קאַרל פֿישער, וועט באַשטיין פֿון דרײַ גאָרנס איבער דער ערד, און דרײַ — אונטער דער ערד. די סטרוקטור וועט אַרײַננעמען ביוראָען, באַנקעט־ און לעקציע־זאַלן און אַ מיקווה. אַ וווינונג פֿאַר הרבֿ אײַזנבערגער און זײַן משפּחה איז אויך אַ טייל פֿונעם פּלאַן, און וועט פֿאַרנעמען בערך 12,224 קוואַדראַטפֿוס, שאַצט די גרונט־מיסחר־פֿירמע New York Yimby.

לויט די בילדער פֿון דער פּלאַנירטער סינאַגאָגע, וועט דער בנין האָבן הויכע סטעליעס; אַ סך ריזיקע פֿענצטער; צוויי גאָרנס פֿאַר די עזרת־נשים אויף ביידע זײַטן פֿונעם בית־הכּנסת, און לאַנגע רייען הילצערנע בענק, כּדי די שיל זאָל קענען אַרײַננעמען אַ גרויסע צאָל מתפּללים.

לויט דער וועבזײַט פֿונעם אַרכיטעקט, וועט דער שיל־בנין זײַן פֿאַרענדיקט ביז 2017.

פֿישער, וואָס האָט ביוראָען סײַ אין ניו־יאָרק, סײַ אין מאָנטרעאָל, האָט שוין אויספּלאַנירט אַ סך בנינים אין וויליאַמסבורג, ווי אויך די פֿאָרשול, עלעמענטאַר־שול און אונטער־מיטלשול קאַמפּוס פֿון דער ישיבֿה „דרכי תּורה‟ אין פֿאַר־ראַקאַוויי.