פּוילישע פּאָליטיקער קומען אויף שבת־וועטשערע

Polish Senior Politicians Come for Shabbos Dinner


פֿון „פֿאָרווערטס‟־רעדאַקציע

Published October 13, 2016, issue of October 26, 2016.

עטלעכע פּויליש־ייִדישע אָרגאַניזאַציעס האָבן פֿרײַטיק־צו־נאַכטס, דעם 7טן אָקטאָבער, אויפֿגענומען אַ גרופּע הויך־ראַנגיקע געזעץ־געבערס און מיניסטאָרן פֿונעם פּוילישן פּאַרלאַמענט אויף אַ שבת־וועטשערע אין וואַרשע.

דער אָוונט איז אָרגאַניזירט געוואָרן דורכן „קולטור־געזעלשאַפֿטלעכן פֿאַרבאַנד פֿון ייִדן אין פּוילן‟ (TSKZ), און דער Jewrnalism Foundation.

בערך 50 מענטשן זענען געקומען אויף דער וועשטערע, אַרײַנגערעכנט די פּוילישע מלוכה־סעקרעטאַרין, אַנאַ מאַריאַ אַנדערס; קאַמילאַ גאַסיוק פּיכאָוויץ, די וואָרטזאָגערין און דעפּוטאַטין פֿון דער „מאָדערמער פּאַרטיי‟; די „סיים‟־דעפּוטאַטין יאָאַנאַ אויגוסטינאָווסקאַ, און מיכאַל שטשערבאַ, דער פּרעזידענט פֿון דער גרופּע „פּויליש־ישׂראלדיקע דעפּוטאַטן פֿון פּאַרלאַמענט‟.

„דער ציל פֿון דער טרעפֿונג איז געווען אָנצוקניפּן אַ פּערזענלעכע באַציִונג צווישן די ייִדישע כּלל־טוער און די פּאָליטיקער פֿון לאַנד,‟ האָט דערקלערט די 28־יאָריקע קלאַודיאַ קלימעק, וואָס האָט געשאַפֿן די פֿונדאַציע און פֿירט אָן מיט דער קראָקעווער פֿיליע פֿונעם TSKZ. „נישטאָ קיין בעסערער אופֿן צונויפֿצוברענגען אונדזערע קהילות און לאָזן פֿון זיך הערן איידער זיך אַוועקזעצן אין אַ באַקוועמער, שׂימחהדיקער סבֿיבֿה.‟

בעת דער וועטשערע האָט מען געשמועסט וועגן ענינים פֿון פֿאַרגיטיקונג, דאָס לערנען וועגן דער געשיכטע פֿון פּוילישע ייִדן, און מדינת־ישׂראל און די רעפּוטאַציע פֿון פּוילן אין אויסלאַנד.

די אונטערנעמונג איז פֿאָרגעקומען במשך פֿון אַן אָנגעשפּאַנטער צײַט צווישן די פֿירער פֿון די פּויליש־ייִדישע קהילות און דער רעגירונג פֿונעם פּרעזידענט אַנדזשיי דודאַ, וואָס געהערט צו דער רעכטגעשטימטער פּאַרטיי „געזעץ און יוסטיץ“.

כאָטש געוויסע פּוילישע ייִדן שטיצן דודאַס פּאָליטיק, וואָס שטעלט זיך אַנטקעגן דער רוסישער אַגרעסיע און וואָס באַערט די פּאָליאַקן וואָס האָבן געראַטעוועט ייִדן בשעתן חורבן — ‎טראָגן אַנדערע ייִדן אַ האַרץ קעגן דעם וואַקסנדיקן נאַציאָנאַליזם און קסענאָפֿאָביע אונטער זײַן ממשלה.