„קאָרעט־פֿונדאַציע‟ שענקט 10 מיליאָן דאָלאַר צו שאַפֿן שול אין „בית התּפוצות‟

Koret Foundation Awards $10 Million To Create School at Tel Aviv Museum

ווי עס דאַרף אויסזען די נײַע אויסשטעלונג אינעם תּל־אָבֿיבֿער מוזיי, וואָס דאַרף זיך עפֿענען אין 2019
Courtesy of Gallagher & Associates
ווי עס דאַרף אויסזען די נײַע אויסשטעלונג אינעם תּל־אָבֿיבֿער מוזיי, וואָס דאַרף זיך עפֿענען אין 2019

פֿון „פֿאָרווערטס‟־רעדאַקציע

Published January 24, 2017, issue of January 27, 2017.

די „קאָרעט־פֿונדאַציע‟ האָט נאָר וואָס געשאָנקען אַ צען מיליאָן־דאָלאַרדיקע סובווענץ דעם „בית התּפֿוצות מוזיי“ אין תּל־אָבֿיבֿ. דער מוזיי וועט אויסניצן דאָס געלט צו שאַפֿן אַ ריזיקע פּערמאַנענטע אויסשטעלונג וואָס וועט הייסן „די אינטערנאַציאָנאַלע שול פֿונעם ייִדישן פֿאָלק א״נ קאָרעט“.

לויט אַ פּרעסע־קאָמוניקאַט פֿונעם מוזיי האָפֿט מען אַז די שול וועט שאַפֿן פֿאַרבינדונגען בײַם ייִדישן פֿאָלק דורך אַ כּלערליייִקער, נאָוואַטאָרישער פֿײַערונג פֿון 4,000 יאָר ייִדיש לעבן, קולטור און געשיכטע.

מוזיי־באַאַמטע האָבן אַנאָנסירט אַז ס׳איז די גרעסטע סומע וואָס דער קנאַפּע פֿערציק־יאָריקער מוזיי האָט ווען עס איז געקראָגן פֿון אַן אַמעריקאַנער פֿילאַנטראָפּישער פֿונדאַציע. די סובווענץ איז פֿאַקטיש איינע פֿון די גרעסטע וואָס די „קאָרעט־פֿונדאַציע‟, וואָס איר ביוראָ געפֿינט זיך אין סאַן־פֿראַנציסקאָ, קאַליפֿאָרניע, האָט אַ מאָל געשאָנקען אַ ישׂראלדיקער אינסטיטוציע.

„מיט דער וויזיאָנערישער שטיץ פֿון דער ׳קאָרעט־פֿונדאַציע׳ — האָט דעקלאַרירט אירינאַ נעווזלין, די פֿאָרזיצערין פֿונעם מוזייס פֿאַרוואַלטונג — וועט דער מוזיי אָן שום ספֿק ווערן דער גלאָבאַלער קנופּ פֿאַר אַ נײַעם דיאַלאָג וועגן דער פֿראַגע וואָס סע הייסט דאָס זײַן נישט נאָר אַ ייִד, נאָר אַ מיטגליד פֿונעם ייִדישן פֿאָלק“. דער מוזיי קוקט אויך אַרויס אַז די אינטערנאַציאָנאַלע שול זאָל ווערן דאָס שײַנדל פֿון דער דערציִונג־פּראָגראַם בײַם מוזיי.

די „קאָרעט־שול‟ וועט זײַן אַ טייל פֿונעם מוזייס איצטיקן רעמאָנט, וואָס מע פּלאַנירט צו פֿאַרענדיקן אין 2019. דער פּראָיעקט, אַרײַנגערעכנט פֿיר גאַלעריעס וואָס האָבן פֿאַר אַ יאָרן געעפֿנט די טירן, איז דערמעגלעכט געוואָרן דורך אַ קאַמפּאַניע וואָס האָט געשאַפֿן אַזש הונדערט מיליאָן דאָלאַר.

אַניטאַ פֿרידמאַן, די פּרעזידענטקע פֿון דער „קאָרעט־פֿונדאַציע‟, האָט מודיע געווען אין אַ פּרעסע־קאָמוניקאַט: „אינעם 21סטן יאָרהונדערט נייטיקן מיר זיך אין נאָוואַטאָרישע ייִדישע אינסטיטוציעס און באַטײַטיקע נײַע צוגאַנגען. די ׳קאָרעט־שול׳ וועט שפּילן אַן עיקרדיקע ראָלע אין שטאַרקן די ייִדישע אידענטיטעט און ייִדישע אַרײַנגעצויגנקייט, און שטעלט מיט זיך פֿאָר אַ נײַע געלעגנהייט צו אַנגאַזשירן, אינספּירירן און דערציִען אירע באַזוכער.‟

„נעמענדיק אין באַטראַכט די הײַנטיקע וועלט־געשעענישן — האָט צוגעגעבן דזשעפֿרי פֿאַרבער, דער הויפּט־עקזעקוטיוו פֿון דער „קאָרעט־פֿונדאַציע‟ — איז דאָס שליחות הײַנט נאָך מער דרינגענדיק ווי פֿריִער.‟