אינטענסיווער ייִדיש־סעמינאַר אין ווענעציע

Intensive Yiddish Seminar in Venice

פֿון רעכטס: חנה (אַניטאַ) נאָריך, שורה ליפּאָווסקי, און סאָניע דראַטווע־פּינקוסאָוויטש
פֿון רעכטס: חנה (אַניטאַ) נאָריך, שורה ליפּאָווסקי, און סאָניע דראַטווע־פּינקוסאָוויטש

פֿון „פֿאָרווערטס‟־רעדאַקציע

Published February 22, 2017, issue of February 23, 2017.

כאָטש ס׳רובֿ מענטשן ווייסן ניט, איז מערבֿ־ייִדיש אַמאָל געווען איינע פֿון די הויפּט־שפּראַכן פֿון די ייִדן אין ווענעציע. דאָרטן האָט מען ניט בלויז גערעדט ייִדיש אינעם טאָגטעגלעכן לעבן, נאָר אויך אַרויסגעגעבן וויכטיקע ביכער און ספֿרים אויף מאַמע־לשון, וואָס מע האָט פֿאַרשפּרייט איבער גאַנץ אייראָפּע.

שוין עטלעכע הונדערט יאָר הערט מען אָבער זעלטן־ווען אַ ייִדיש וואָרט אין דער באַקאַנטער איטאַליענישער שטאָט פֿון קאַנאַלן. די אָרטיקע ייִדן זענען לאַנג אַריבער אויף ווענעציאַניש (אַ קרובֿ פֿון איטאַליעניש) און די לעצטע שפּורן פֿון ייִדיש אין זייער רייד זענען שוין לאַנג פֿאַרשוווּנדן געוואָרן.

אין אַפּריל וועט אָבער אין ווענעציע ווידער אָפּהילכן אַ ייִדיש וואָרט אַ דאַנק אַ פֿינף־טאָגיקן סעמינאַר פֿון ייִדישער שפּראַך און קולטור, אָרגאַניזירט דורכן אָרטיקן קולטור־צענטער „בית־ווענעציע‟, באַנאַנד מיטן „ייִדישן אינסטיטוט אויפֿן נאָמען פֿון מאַרטין בובער‟ בײַם „פֿרײַען אוניווערסיטעט פֿון בריסל‟. די אַקטיוויטעטן, אויף ייִדיש, ענגליש און פֿראַנצייזיש, וועלן אַרײַננעמען שפּראַכקלאַסן פֿאַר אָנהייבער ביז אַוואַנסירטע סטודענטן, זינג־וואַרשטאַטן, רעפֿעראַטן וועגן דעם אַמאָליקן ייִדישן לעבן אין ווענעציע און פֿילם־ווײַזונגען.

די דרײַ פּראָפֿעסאָרשעס וואָס וועלן לערנען אויפֿן סעמינאַר זענען סאָניע דראַטווע־פּינקוסאָוויטש (פֿרײַער אוניווערסיטעט פֿון בריסל), שורה ליפּאָווסקי און חנה (אַניטאַ) נאָריך (מישיגענער אוניווערסיטעט). די פּראָגראַם וועט פֿאָרקומען פֿונעם 3טן ביזן 7טן אַפּריל. דער שׂכר־לימוד, וואָס איז 350$, וועט דעקן די קאָסטן פֿון די קלאַסן, אַקטיוויטעטן און מיטאָגן אָבער ניט די הוצאָות פֿון וועטשערע אָדער נאַכטלעגער.

כּדי צו באַקומען נאָך אינפֿאָרמאַציע שרײַבט גיסעפּע באַלזאַנאָ אויף gbalzano1@gmail.com.