ישׂראל: פּראָגראַם אויף ייִדיש פֿון פּערזענלעכע חורבן־זכרונות מיט געזאַנג

Israel: Program in Yiddish To Combine Personal Holocaust Stories with Song


פֿון „פֿאָרווערטס‟־רעדאַקציע

Published April 05, 2017, issue of April 27, 2017.

ווי אַ טייל פֿון דער טרויער־אַקאַדעמיע, וואָס ווערט אײַנגעאָרדנט דורכן ישׂראלדיקן ייִדישן טעאַטער „ייִדישפּיל‟ בשותּפֿות מיט דער „נאַציאָנאַלער אינסטאַנץ פֿאַר ייִדישער קולטור‟, דעם מוניציפּאַליטעט פֿון תּל־אָבֿיבֿ און דער אָרגאַניזאַציע „צוותא הבית לתּרבות ישׂראליה‟, וועלן די אַקטיאָרן פֿונעם „ייִדישפּיל‟־טעאַטער פֿאָרשטעלן ייִדישע לידער. די מוזיק וועט באַגלייטן אַ ריי ייִדן פֿון דער שארית־הפּליטה, וואָס וועלן באַשרײַבן זייערע איבערלעבונגען פֿון יענע גרויליקע יאָרן.

אַחוץ די אַקטיאָרן און די ייִדן פֿון דער שארית־הפּליטה וועלן אויך אויפֿטרעטן צוויי פּראָמינענטע פּאָליטיקער — רון חולדאי, דער בירגערמײַסטער פֿון תּל־אָבֿיבֿ — און לימור לבֿנת, אַ לאַנגיאָריקע געוועזענע כּנסת־דעפּוטאַטקע וואָס פֿירט איצט אָן מיטן נאַציאָנאַלן פֿאָנד פֿאַרן וווילשטאַנד פֿון די חורבן־געליטענע. די פּראָגראַם, אונטער דער רעזשי פֿון ליה ברזל־מלמד, וועט פֿאָרקומען אין גאַנצן אויף ייִדיש מיט אַ גלײַכצײַטיקער איבערזעצונג אויף העברעיִש דורך איבערקעפּלעך. אַחוץ די לידער און רעדעס וועט מען אויך אָנצינדן אַ נר־תּמיד לזכר די חורבן־קרבנות.

די פּראָגראַם וועט פֿאָרקומען סײַ אין תּל־אָבֿיבֿ (זונטיק, דעם 23סטן אַפּריל), סײַ אין ירושלים (מאָנטיק, דעם 24סטן אַפּריל, אָן דער באַטייליקונג פֿון די פּאָליטיקער). אין תּל־אָבֿיבֿ וועט די טרויער־אַקאַדעמיע פֿאָרקומען 7:30 אין אָוונט אינעם „צוותא־זאַל‟. אין ירושלים וועט די פּראָגראַם פֿאָרקומען 9:50 אין דער פֿרי אינעם „טעאַטער־ירושלים‟.

דער אײַנטריט איז בחינם אויב מע פֿאַרשרײַבט זיך פֿון פֿריִער. כּדי זיך צו רעגעסטרירן קלינגט 5254660־03 (פֿאַר תּל־אָבֿיבֿ) און 5605755־02 (פֿאַר ירושלים).