דער בירגער־מײַסטער פֿון שטעטל פֿאַרברענגט אַ שבת מיטן רבֿ

A Small-Town Mayor Spends Shabbos With The Rabbi


פֿון Forward

Published July 27, 2017, issue of July 28, 2017.

אַ לייענער האָט אונדז לעצטנס געשיקט דעם ווײַטערדיקן אַנעקדאָט, וואָס האָט בײַ אונדז אַרויסגערופֿן אַ שמייכל. מסתּמא איז עס גיכער אַ וויץ ווי אַן אמתע איבערלעבונג, אָבער ס׳שאַט סײַ־ווי נישט אַ מאָל צוצוגעבן אַ ביסל הומאָר צו די נײַעס פֿון טאָג.

כּדי בעסער צו פֿאַרשטיין זײַנע ייִדישע וויילער האָט דער בירגער־מײַסטער פֿון אַ געוויסן שטעטל זיך געשטעלט אין פֿאַרבינדונג מיט אַ פּאָפּולערן רבֿ. האָט דער רבֿ פֿאַרבעטן דעם בירגער־מײַסטער אַז ער זאָל פֿאַרברענגען שבת בײַ אים אין דער היים. דער בירגער־מײַסטער האָט די פֿאַרבעטונג אָנגענומען.

פֿרײַטיק־צו־נאַכטס אַז מע האָט זיך געזעצט צום טיש האָט דער רבֿ געמאַכט קידוש איבער אַ פֿולן כּוס ווײַן.

נאָכן פֿאָרשפּײַז האָט ער צו די געפֿילטע פֿיש געמאַכט אַ לחיים, מיט אַ פֿײַנעם בראָנפֿן.

צום הויפּטגאַנג האָט מען געשטעלט אויפֿן טיש אַ פֿלאַש ישׂראלישער ווײַן.

נאָכן מאָלצײַט האָט מען אָפּגעבענטשט איבער אַ כּוס ווײַן.

דעם צווייטן טאָג אין שיל, נאָכן דאַווענען, האָט מען גענאַשט הערינג מיט פּלעצעלעך און געטרונקען נאָך עטלעכע לחיימס איבער שנאַפּס. מ׳איז אַהיימגעגאַנגען, דער רבֿ האָט ווידער געמאַכט קידוש, נאָך אַ כּוסע מיטן פֿיש, און אויסגעטרונקען אַ מחיהדיקן איינמאַלציקן וויסקי.

אַז ס׳איז צוגעפֿאַלן די נאַכט און ס׳איז געוואָרן אויס שבת האָט דער רבֿ געמאַכט הבֿדלה איבער נאָך אַ כּוס ווײַן.

זאָגט דער בירגער־מײַסטער צום רבֿ: „אַ דאַנק פֿאַרן פֿאַרבעטן מיך אויף שבת; כ׳האָב טאַקע זייער גוט פֿאַרבראַכט. כאָטש איך פֿאַרשטיי ווײַטער נישט פֿאַר וואָס איר צינדט נישט אָן און פֿאַרלעשט נישט די ליכט, פֿאַרשטיי איך שוין יאָ פֿאַר וואָס איר פֿירט נישט קיין אויטאָ!“