משה פֿרידמאַנס זין טאָרן זיך נישט לערנען אין אַ מיידל-שול

Moshe Friedman's Sons May Not Go To Girls' School

משה-אַריה פֿרידמאַן (רעכטס) מיט זײַן ווײַב, לאה ראָזענצווײַג
JTA
משה-אַריה פֿרידמאַן (רעכטס) מיט זײַן ווײַב, לאה ראָזענצווײַג

Published February 06, 2013.

אַנטווערפּן, בעלגיע. — דעם 6סטן פֿעברואַר האָט די פֿרומע אויסגאַבע „כּיכּר השבת‟ איבערגעגעבן, אַז משה-אַריה פֿרידמאַן, אַ קאָנטראָווערסאַלער 40־יאָריקער חרדישער רבֿ, וועלכער איז אַמאָל געווען פֿאַרבונדן מיט דער אַנטי-ציוניסטישער גרופּע „נטורי-קרתּא‟, האָט פֿאַרלוירן דאָס רעכט צו שיקן זײַנע צוויי זין אין אַ פֿרומער שול פֿאַר מיידלעך.

אינעם יאָר 2006, האָט פֿרידמאַן זיך באַטייליקט אין דער סתּירותדיקער טעהעראַנער חורבן-קאָנפֿערענץ, וווּ ער האָט געמאָלדן, אַז „הגם ער לייקנט נישט אָפּ דעם ייִדישן חורבן‟, האַלט ער, אַז בעת דער צווייטער וועלט-מלחמה זענען, „לויט די פֿרישע פֿאָרשונגען‟, אומגעקומען בלויז איין מיליאָן ייִדן, און אַז די ציפֿער פֿון זעקס מיליאָנען איז אַן אויסטראַכטעניש פֿון טעאָדאָר הערצל.

צוליב זײַנע אויסטערלישע דעות, האָט מען אַרויסגעוואָרפֿן פֿרידמאַנען פֿון דער ייִדישער קהילה אין עסטרײַך, וווּ ער האָט פֿריִער געוווינט, סײַ פֿון „נטורי-קרתּא‟. די פֿרומע שולן אין אַנטווערפּן, וווּ ער וווינט איצט, האָבן זיך אָפּגעזאָגט אָנצושליסן זײַנע צוויי קינדער.

פֿרידמאַן האָט געפּרוּווט צו לייזן זײַן סיטואַציע אויף אַן אומגעוויינטלעכן אופֿן, און געפֿאָדערט, דורך אַ געריכט, אָנצונעמען זײַנע זין אין אַ פֿרומער מיידל-שול און זײַנע טעכטער — אין דער געמישטער פֿרומער שול „יבֿנה‟. מיט אַ חודש פֿריִער, האָט די ריכטערין באַשלאָסן, אַז פֿרידמאַנס צוויי קליינע זין האָבן טאַקע אַזאַ רעכט, און געצוווּנגען די מיידל-שול „בנות-ירושלים‟ זיי אָנצונעמען. די זעלבע ריכטערין האָט אָבער שפּעטער געגאָזט, אַז זי קאָן נישט דערווײַל אָננעמען „אַ צײַטווײַליקן באַשלוס אין שײַכות מיט אַ שטענדיקער סיטואַציע‟ לגבי פֿרידמאַנס דרײַ טעכטער, פֿון 13 ביז 17 יאָר אַלט. לויט „כּיכּר-השבת‟, האָט די מיידל־שול זיך דערשלאָגן דורכן געריכט דאָס רעכט מער נישט אַרײַנצולאָזן פֿרידמאַנס זין.