ירושלימער פֿוסבאָל־קלוב אונטערגעצונדן

Jerusalem Soccer Club Set on Fire

דער שאָדן נאָך דער שׂריפֿה אינעם לאָקאַל פֿון דער ירושלימער „ביתּר‟־פֿוסבאָל־מאַנשאַפֿט
AHMAD GHARABLI/AFP/Getty Images
דער שאָדן נאָך דער שׂריפֿה אינעם לאָקאַל פֿון דער ירושלימער „ביתּר‟־פֿוסבאָל־מאַנשאַפֿט

Published February 08, 2013.

(ייִט״אַ) דעם 8טן פֿעברואַר, אַ טאָג נאָך דעם ווי מע האָט אַרעסטירט פֿיר פֿאַנאַטיקער פֿון דער פֿוסבאָל־מאַנשאַפֿט „ביתּר־ירושלים‟, האָט מען אונטערגעצונדן דעם טראָפֿעע־צימער פֿון דער מאַנשאַפֿט. מע האָט זיי באַשולדיקט אין העצערישע רייד קעגן די מוסולמענער.

אַסף עווערס, אַ פֿאָרשטייער פֿונעם פֿײַערלעשער–אָפּטייל, האָט באַשטעטיקט, אַז די שׂריפֿה האָט מען בכּיוון אָנגעצונדן פֿרײַטיק אין דער פֿרי. קיינער איז נישט פֿאַרוווּנדיקט געוואָרן, אָבער דער צימער איז אין גאַנצן צעשעדיקט געוואָרן — „די גאַנצע געשיכטע פֿון ׳ביתּר׳ איז פֿאַרברענט געוואָרן‟, האָט מאיר כאַרוש, דעם ממונה פֿונעם קלוב, געזאָגט.

לויט דער באַשולדיקונג, האָבן די פֿיר פֿוסבאָל־פֿאַנאַטיקער, אַלע אין די 20ער יאָרן, אויסגעשריגן — „אַ טויט די אַראַבער‟ — בשעת זיי האָבן געקוקט אויף דער שפּיל. עס קען זײַן, אַז זיי האָבן די רייד געצילט אויף די צוויי מוסולמענישע שפּילער פֿון טשעטשען, דזשאַברײַל קאַדיִעוו און זאַור סאַדײַעוו, וועלכע מע האָט לעצטנס אַרײַנגעבראַכט אין דער „ביתּר‟־מאַנשאַפֿט.

דעם דאָנערשטיק האָבן 20 פֿאָרשטייער פֿון דער אַלוועלטלעכער ציוניסטישער יוגנט־באַוועגונג יוגנט־באַוועגונג פֿון „ביתּר‟ געשאָנקען בלומען די צוויי שפּילער, ווי אַ דאַנק פֿאַר זיך אָנשליסן אין דער מאַנשאַפֿט. איציק קאָרנפֿײַן, דער פֿאָרזיצער פֿון דער „ביתּר‟־מאַנשאַפֿט האָט דאָנערשטיק געזאָגט, אַז „מיר ווילן ווערן אַן אַנדער מין ׳ביתּר׳‟.