ידיעות פֿון מעלבורן

News From Melbourne

דער דענקמאָל פֿון ראַול װאַלענבערג אין דער פֿאָרשטאָט קיו
דער דענקמאָל פֿון ראַול װאַלענבערג אין דער פֿאָרשטאָט קיו

פֿון שרה זילבערמאַן

Published April 20, 2015, issue of May 15, 2015.

פּלענער אױף אַ נײַער אױסשטעלונג װעגן ראַול װאַלענבערג

דער שװעדישער אַמבאַסאַדאָר האָט באַזוכט דעם מעלבורנער דענקמאָל אין אָנדענק פֿונעם שװעדישן דיפּלאָמאַט ראַול װאַלענבערג, דעם רעטער פֿון פֿיל אונגאַרישע ייִדן אין 1944 און 1945. דער דענקמאָל געפֿינט זיך אין דער פֿאָרשטאָט קיו. דער סקולפּטאָר דערפֿון איז געװען דער פּליט קאָרל דולדיג. דער אַמבאַסאַדאָר האָט זיך געטראָפֿן מיטן לאָקאַלן פֿאָרשטײער אינעם פֿעדעראַלן פּאַרלאַמענט און גערעדט װעגן זײַנע פּלענער פֿאַר אַ נײַער אױסשטעלונג װעגן װאַלענבערגן. הײַיאָר װערט 70 יאָר זינט װאַלענבערג איז פֿאַרשװוּנדן געוואָרן נאָך דעם װי די סאָװעטן האָבן פֿאַרנומען בודאַפּעשט.

אַ רײ פֿירמעס װעלן מער נישט דרוקן דעם כּשרת־סימבאָל אױף פּעקלעך

דער ועד־הכּשרת פֿון דער שטאַט װיקטאָריע האָט געמאָלדן, אַז אַ רײ שפּײַז־פֿירמעס האָבן באַשלאָסן מער נישט צו דרוקן זײַן סימבאָל אױף די פּעקלעך פֿון די שפּײַזן נאָך דעם, װאָס די רעכט־געשטימטע גרופּעס האָבן געפֿאָדערט, אַז די איסלאַמישע כאַלאַל־צערטיפֿיקאַציע זאָל פֿאַרװערט װערן אין אױסטראַליע. לױטן ועד, האָבן צען פֿירמעס געזאָגט, אַז זײ װילן נאָך אַלץ האָבן צערטיפֿיקאַציע פֿון כּשר־שפּײַז, נאָר אױב זײ װעלן מער נישט דרוקן די כאַלאַל־צערטיפֿיקאַציע, קענען זײ מער נישט דרוקן די כּשרת־צערטיפֿיקאַציע. פֿיר אָדער פֿינף פֿירמעס האָבן צוגענומען די כּשרת־צערטיפֿיקאַציע פֿון זײערע פּראָדוקטן. דער פּרעזידענט פֿונעם עקזעקוטיװ־ראַט פֿון אױסטראַלישן ייִדנטום האָט געזאָגט: „אױב עס איז אמת, אַז אַ טײל פֿירמעס האָבן מורא, אַז די אַלגעמײנע באַפֿעלקערונג פֿון לאַנד װעט בויקאָטירן די פּראָדוקטן, װעלכע טראָגן סימבאָלן פֿון זײער אָנערקענונג װי כּשר אָדער װי כאַלאַל, איז דאָס אַ גרױסע פּראָבלעם פֿאַר אױסטראַליע, װאָס שפּיגלט אָפּ רעליגיעזע אומטאָלעראַנץ.‟

די רעגירונג װעט אױספֿאָרשן דעם „אָסטרעליען דזשויִש קאָמיונעל לאָבי”

אַ צװײַג פֿון דער פֿעדעראַלער רעגירונג װעט אױספֿאָרשן דעם „אָסטרעליען דזשויִש קאָמיונעל לאָבי” נאָך דעם װי צװײ פֿון די פֿינף פֿאַרשריבענע דירעקטאָרן פֿונעם „לאָבי” האָבן געזאָגט, אַז זײ האָבן קײן מאָל נישט אָנגענומען די פּאָסטנס. אײנער פֿון זײ האָט רעזיגנירט אַזױ גיך װי ער האָט זיך דערװוּסט, אַז דער „לאָבי” האָט אָנגעזאָגט דער רעגירונג אין נאָװעמבער, 2014, אַז ער איז זײַנער אַ דירעקטאָר. דאָס איז געשען אין חודש מאַרץ. דער פּרעזידענט פֿונעם „לאָבי” װיל אָפּזאָגן אַ צװײטן דירעקטאָר נאָך דעם װי יענער האָט פֿאַרעפֿנטלעכט אױפֿן „לאָביס” פֿײסבוק־זײַט, אַז דער „לאָבי” װעט באַצאָלן לעגאַלע קאָסטן פֿון אַלע, װעלכע זײַנען אַרעסטירט געװאָרן בעת זײ האָבן פּראָטעסטירט קעגן פּליטים מיט עטלעכע װאָכן צוריק. אַ דריטער דירעקטאָר איז גאָרנישט קײן ייִד און זאָגט, אַז אױך ער האָט נישט געזאָגט, אַז ער איז מסכּים צו זײַן אַ דירעקטאָר פֿונעם „לאָבי”. אַ פֿערטער דירעקטאָר האָט אױך געזאָגט, אַז ער איז קײן מאָל נישט מסכּים געװען צו װערן אַ דירעקטאָר פֿונעם „לאָבי”. דער פּרעזידענט פֿונעם „לאָבי” זאָגט, אַז ער װעט אַרױסהעלפֿן די, װעלכע פֿירן אָן מיט דער אױספֿאָרשונג.

2 חורבן־אַקאַדעמיעס אין קװינסלאַנד

העכער 250 פּערזאָן זײַנען בײַגעװען אױף צװײ חורבן־אַקאַדעמיעס, װעלכע זײַנען פֿאָרגעקומען אין דער שטאַט קװינסלאַנד, אין װײַטן צפֿון פֿון אױסטראַליע. די אַקאַדעמיעס זײַנען פֿאָרגעקומען אין דער הױפּט־שטאָט, בריזבײן, און אינעם „גאָלד קאָוסט”.

„מיזרחי”־רבֿ געזעגנט זיך מיט מעלבורן

250 פּערזאָן זײַנען בײַגעװען אױף דעם געזעגענונגס־אָװנט פֿאַרן לאָקאַלן „מיזרחי” הױפּט־רבֿ, הרבֿ יעקבֿ ספּרונג. ער איז געקומען קײן אױסטראַליע אין 2005. ער האָט אױך געדינט װי דער רבֿ המכשיר פֿונעם מעלבורנער עירובֿ. די ספּרונג־משפּחה פֿאָרט צוריק קײן אַמעריקע. די “מיזרחי”־מתפּללים האָבן אָפּגעשטימט אין נאָװעמבער 2014 נישט צו באַנײַען הרבֿ ספּרונגס קאָנטראַקט.

צוזאַמען־אַרבעט פֿון אָרגאָניזאַציעס אין מעלבורן און אין סידנעי

אָרגאָניזאַציעס אין מעלבורן און אין סידנעי פֿון ייִדישע האָמאָסעקסואַליסטן, לעזביאַנקעס, בײַ־סעקסואַליסטן, טראַנס־מין און אינטער־מין ייִדן זײַנען זיך צונױפֿגעקומען צו אָרגאַניזירן אַ סוף־װאָך פֿאַר זײערע מיטגלידער, װאָס װעט פֿאָרקומען אין מעלבורן. דער ציל פֿון דער אונטערנעמונג איז צונױפֿצוברענגען זײערע מיטגלידער מיט אַנדערע ייִדן.

ייִדישע יוגנטלעכע בײַ ראָבאָטיקס פֿאַרמעסט

צװײ מאַנשאַפֿטן פֿון מעלבורנער ייִדישע מיטלשול־תּלמידים און תּלמידות זײַנען געפֿאָרן קײן סידנעי, כּדי אָנטײלצונעמען אינעם ערשטן אױסטראַלישן ראָבאָטיק־פֿאַרמעסט. אײנע פֿון די מאַנשאַפֿטן איז פּרעמירט געװאָרן פֿאַר איר פּראָגרעס במשך פֿונעם פֿאַרמעסט.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.