ידיעות פֿון מעלבורן

News from Melbourne

פֿון שׂרה זילבערמאַן

Published January 19, 2016, issue of February 05, 2016.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

קהילה דערמאָנט קרבנות פֿון פֿאַראַיאָריקן פּאַריזער אַטאַק

די אױסטראַלישע ייִדן האָבן דערמאָנט די זעקס ייִדן און צען נישט־ייִדן, װעלכע זײַנען אומגעקומען אין פּאַריז פֿאַראַיאָרן יאַנואַר װי אַ רעזולטאַט פֿון די טעראָריסטישע אָנפֿאַלן.

דער פּרעזידענט פֿונעם עקזעקוטיװ־ראַט פֿון אױסטראַלישן ייִדנטום האָט באַצײכנט די דאַטע װי „אַ צײַט זיך אָפּצושטעלן און צו באַטראַכטן זיך“. דער עקזעקוטיװ־דירעקטאָר פֿונעם „אױסטראַליע־ישׂראל און ייִדישע ענינים־ראַט‟ האָט גערעדט װעגן דער דאַטע װי וועגן אַ צײַט, װען מע דאַרף „באַטראַכטן די אַנדערע טעראָריסטישע אָנפֿאַלן, װעלכע זײַנען פֿאָרגעקומען אין פֿאַרלױף פֿונעם פֿאַרגאַנגענעם יאָר“.

דער פֿאָרזיצער פֿון דער „בני־ברית‟, אַנטי־דעפֿאַמאַציע־קאָמיסיע האָט באַטאָנט, אַז „מיר שטײען פֿאַראײניקט אין אָנדענק פֿון די אומגעקומענע און שענקען זײערע משפּחות און פֿרײַנד אונדזערע געדאַנקען און כּוח, האָפֿנדיק, אַז זײ װעלן געפֿינען טרײסט אין אונדזער אײניקײט און פֿון אונדזער באַשלוס אָפּצושאַפֿן דאָס שלעכטס פֿון עקסטרעמיזם, װאָס שטעלט אונדזער לעבנס־שטײגער אין סכּנה“. ער האָט אױך דערמאָנט דעם מוסולמענישן אָנגעשטעלטן, װאָס האָט געראַטעװעט דאָס לעבן פֿון זיבן ייִדן אין דעם „היפּער קאַשער‟־סופּערמאַרק.

6 ייִדישע טעניס־שפּילערס אױפֿן אױסטראַלישן טעניס־פֿאַרמעסט

זעקס ייִדישע טעניס־שפּילערס פֿון ישׂראל, אַמעריקע און איטאַליע גרײטן זיך צו שפּילן אינעם אױסטראַלישן אָפֿענעם טעניס־פֿאַרמעסט אין מעלבורן. קאַמילע דזשיאָרדזשי איז פֿון איטאַליע; סקאָט ליפּסקי איז אַן אַמעריקאַנער, װאָס ספּעציאַליזירט זיך אינעם שפּילן אין פּאָרן. דזשוליאַ קלאַסקאָ פֿון ישׂראל איז געבױרן געװאָרן אין אוקראַיִנע; דודי סלה איז ישׂראלס בעסטער טעניס־שפּילער; שהר פּיר, אױך פֿון ישׂראל, װערט פֿאַררעכנט װי איינע פֿון די בעסטע טעניס־שפּילערינס אין דער װעלט; און אַמיר װײַנטרױב קומט אױך פֿון ישׂראל. אַלע קוקן אַרױס אױף די פֿאַרמעסטן און אױף מעלבורנס ייִדישע ספּאָרט־אונטערשטיצער.

ייִדן העלפֿן אַרױס אַ לײַדנדיקער משפּחה

יצחק ראָזען, ז״ל, מיט זײַן משפּחה
יצחק ראָזען, ז״ל, מיט זײַן משפּחה

אױסטראַלישע ייִדן האָבן געזאַמלט העכער הונדערט פֿופֿציק טױזנט אױסטראַלישע דאָלאַרן במשך פֿון אײן טאָג, כּדי אַרױסצוהעלפֿן אַ מעלבורנער ייִדישער משפּחה, װעמענס טאַטע, יצחק ראָזען, איז אומגעקומען בעת אַ משפּחה־װאַקאַציע לעבן מעלבורן. די שולן זײַנען איצט פֿאַרמאַכט אויף די זומער־וואַקאַציעס.

דער טאַטע איז אַרױסגעגאַנגען פֿונעם צימער, װאָס די משפּחה האָט געדונגען אין אַ קלוב נישט װײַט פֿון מעלבורן, און איז געשטאָרבן אין שפּיטאָל מיט אַ טאָג שפּעטער. זײַן נײַן־יעריקער צװילינג האָט אַפֿילו געפֿײַערט זײער געבורטסטאָג אין אַ באַזונדערן שפּיטאָל־צימער. פֿרײַנד פֿון דער משפּחה זאָגן, אַז ראָזען, אַ גראַדואַנט פֿון דער מעלבורנער ישיבֿה, איז געװען „אַן אמתער מענטש“, װאָס איז געװען איבערגעגעבן זײַן משפּחה און זײַן קהילה.

דער ספּאָרט־קאַרנאַװאַל הײבט זיך אָן

דער יערלעכער „מכּבי־קאַרניװאַל‟ פֿאַר 400 ייִנגערע ייִדישע ספּאָרטלער פֿון אױסטראַליע און נײַ־זעלאַנד האָט זיך אָנגעהױבן אין סידנעי. דער פֿאַרמעסט װעט דױערן אײן װאָך.

ייִדישע טאָגשול אױפֿן ערשטן אָרט אין װעסטערן־אױסטראַליע

די ייִדישע „כּרמל־טאָגשול‟ אין פּערט, װעסטערן־אױסטראַליע, האָט געהאַט די גרעסטע צאָל תּלמידים און תּלמידות אין דעם שטאַט װעסטערן־אױסטראַליע, װעלכע האָבן געהאַט צײכנס העכער װי 75% אױף די שטאַטישע סוף־יאָר־עקזאַמענס פֿאַרן 12טן לערן־יאָר, אין 2015. צװײ דריטל פֿון אירע גראַדואַנטן אין פֿאַרגאַנגענעם יאָר האָבן געהאַט צײכנס העכער מיט 10% פֿון אַלע תּלמידים און תּלמידות אין װעסטערן־אױסטראַליע.

ייִדן העלפֿן אַרױס געליטענע פֿון װאַלד־שׂריפֿות

צװײ ייִדן פֿון פּערט, װעסטערן־אױסטראַליע, זײַנען געפֿאָרן מער װי 700 קילאָמעטער מיט אָנגעפּאַקטע אױטאָמאָבילן, כּדי אַרױסצוהעלפֿן די אײַנװױנער פֿונעם שטעטל יאַרלופּ. די אײַנװױנער פֿונעם שטעטל האָבן נאָר געהאַט אַ -25מינוטוקע װאָרענונג ביז די שׂריפֿה האָט דערגרײכט דאָס שטעטל. 128 הײַזער זײַנען פֿאַרברענט געװאָרן אינעם שטעטל און צװײ עלטערע לײַט זײַנען אומגעקומען בעת דער שׂריפֿה. 50 פּערטער ייִדישע משפּחות האָבן געזאַמלט מאַטעריאַלן, װעלכע האָבן געװײגט אײן טאָנע, און אַלץ איבערגעגעבן די צװײ „שלעפּערס“, װי זײ האָבן זיך אַלײן באַשריבן. זײ האָבן זיך אױך בײַגעשטײַערט מיט די גרױסע מאַשינען, אין װעלכע די צװײ האָבן געפֿירט די אַלע זאַכן קײן יאַרלופּ.

לאָקאַלער ייִדישער סטודענטן־פֿאַראײן אָנערקענט

דער אױסטראַלישער ייִדישער סטודענטן־פֿאַראײן, „אָדזשעס‟, איז אָנערקענט געװאָרן װי דער אַקטיװסטער און אינאָװאַטיװסטער ייִדישער סטודענטישער פֿאַראײן אין גאָר דער װעלט, דורכן „װעלט־פֿאַראײן פֿונעם ייִדישן סטודענטן־קאָנגרעס‟, װאָס איז פֿאָרגעקומען לעצטנס לעבן ירושלים.