ישׂראל באָמבאַרדירט קאָנוווי בײַ דער סירישער גרענעץ

Israel Bombs Convoy at the Syrian Border

Published January 31, 2013, issue of February 15, 2013.

צה״ל האָט דינסטיק בײַ נאַכט אַטאַקירט אַ קאָנוווי אויף דער גרענעץ צווישן סיריע און לבֿנון, אויס זאָרג וועגן דעם גורל פֿון סיריעס כעמישע און אַוואַנסירטע קאָנווענציאָנעלע וואָפֿנס, האָט מיט.וואָך איבערגעגעבן אַ מערבֿ­דיקער דיפּלאָמאַט, ווי אויך די אָרטיקע זיכער­הייט־כּוחות.

די קוואַלן, וועלכע האָבן געבעטן בלײַבן אַנאָנים, האָבן נישט געוווּסט פּינקטלעך וואָס האָט זיך געפֿונען אין די אויטאָס פֿונעם קאָנוווי; ווער האָט זיי געפֿירט, אָדער וווּ דער אַטאַק איז פֿאָרגעקומען.

פֿאַרן אַטאַק האָבן די ישׁראלדיקע הויכע באַאַמטע עפֿנטלעך געוואָרנט וועגן דער סכּנה, אַז הויך־טעכנאָלאָגישע אַנטי־עראָפּלאַן־ און אַנטי־טאַנק־ראַקעטן פֿון סיריע קאָנען אַרײַנפֿאַלן אין די הענט פֿון „כעזבאָלאַ‟. די באַאַמטע האָבן אויך איבערגעחזרט די וואָרענונג אויסגע­דריקט פֿון די פֿאַראייניקטע שטאַטן אין שײַכות מיט סיריעס אַרסענאַל פֿון כעמישן געווער.

זונטיק האָט דער ישׂראלדיקער וויצע־פּרעמיער סילוון שלום געזאָגט, אַז אויב ישׂראל וועט זען סימנים, אַז סיריע פֿאַרלירט דעם קאָנ­טראָל איבער איר וואָפֿן־אַרסענאַל, בעת די אויפֿ­שטענדלער באַמיִען זיך צו פֿאַרטרײַבן פּרע­זידענט באַשאַר אַל־אַסאַד פֿון דער מאַכט, וועט ישׂראל אפֿשר דורכפֿירן איר אייגענע אַקציע.

די ישׂראלדיקע קוואַלן האָבן דינסטיק באַ­טאָנט, אַז סיריעס אַוואַנסירטע קאָנווענציאָנעלע וואָפֿנס וואָלטן געווען פּונקט אַזוי געפֿערלעך פֿאַר ישׂראל, ווי דאָס כעמישע געווער, טאָ­מער וואָלטן זיי אַרײַן אין די הענט פֿון די איס­לאַמיסטישע אויפֿשטענדלער אָדער „כעזבאָלאַ‟־מיליטאַנטן אין לבֿנון.

די ישׂראלדיקע מעדיאַ האָט די וואָך איבער­געגעבן, אַז דער ישׂראלדיקער עצה־געבער פֿאַר נאַציאָנאַלער זיכערהייט, יעקבֿ אַמידרור, איז געפֿאָרן קיין רוסלאַנד, און דער הויפּט פֿון די מיליטערישע אויסשפּיר־ענינים, גענעראַל־מאַיאָר אַבֿיבֿ קכבֿי, איז געפֿאָרן אין די פֿאַראייניקטע שטאַטן, זיך צו האַלטן אַן עצה וועגן די לעצטע אַנטוויקלונגען.

ווי אַ רעזולטאַט פֿון די וואָרענונגען וועגן סיריע און „כעזבאָלאַ‟, האָבן אַ סך ישׂראלים די וואָך באַשטעלט גאַזמאַסקעס בײַ דער רעגירונג. לויט דעם ישׂראלדיקן פּאָסטאַמט, איז דער נאָכפֿרעג די וואָך געווען דרײַ מאָל גרעסער ווי פֿריִער.