צוויי מענטשן דערהרגעט אין אַמבאַסאַדע-אויפֿרײַס

Two killed in US embassy blast

Getty Images

Published February 01, 2013, issue of February 15, 2013.

אַנקאַראַ, טערקײַ (ייִט״אַ). — פֿרײַטיק, דעם 1טן פֿעברואַר, זענען צוויי מענטשן אומגעקומען בעת אַן אויפֿרײַס בײַם אַרײַנגאַנג צו דער אַמעריקאַנער אַמבאַסאַדע אין דער טערקישער הויפּטשטאָט, אַנקאַראַ. לויט די אָפֿיציעלע אינסטאַנצן, איז עמעצער — מסתּמא, אַ זעלבסטמערדערישער טעראָריסט — צוגעקומען צום זיכערהייט-פּונקט בײַם אַמבאַסאַדע-בנין און דעטאָנירט דאָרטן זײַן אויפֿרײַס-מכשיר, דערהרגענדיק אַ וואַכמאַן און זיך אַליין. פֿרענסיס ריקיאַרדאָן, דער אַמעריקאַנער אַמבאַסאַדאָר אין טערקײַ, האָט איבערגעגעבן, אַז בעת דעם אַטאַק איז אַ טערקישער בירגער פֿאַרוווּנדעט געוואָרן בעת דעם אַטאַק.

קאַמיִאַר באַרנאָס, וועלכער אַרבעט אין אַ טוריסטישער אַגענטור 100 מעטער פֿון דער אַמבאַסאַדע, האָט איבערגעגעבן, אַז דער אויפֿרײַס איז געווען גאָר אַ שטאַרקער. די באָמבע האָט אויסגעזעצט דעם פֿענצטער אין זײַן ביוראָ, וווּ ער האָט זיך דעמאָלט געפֿונען. באַרנאָס האָט צוגעגעבן, אַז ער האָט געזען אויף דער גאַס עפּעס, וואָס זעט אויס ווי אַ טייל פֿון אַ גוף. די טעלעוויזיע האָט געוויזן, אַז דער אויפֿרײַס האָט צעשעדיקט נאָר די טיר און די וואַנט-באַצירונג בײַם אַרײַנגאַנג צו דער אַמבאַסאַדע; ווײַזט אויס, אַז דער בנין האָט נישט געליטן פֿון אַן ערנסטן היזק.

דערווײַל איז נאָך נישט קלאָר, וואָס פֿאַר אַ גרופּע טראָגט דאָס אַחריות פֿאַרן אויפֿרײַס. די „קורדישע אַרבעטער-פּאַרטיי‟, אַ ראַדיקאַלע סעפּאַראַטיסטישע אָרגאַניזאַציע, ווערט פֿאַררעכנט אין טערקײַ ווי די גרעסטע זיכערהייט-פּראָבלעם; זי אַטאַקירט אָבער נישט, געוויינטלעך, קיין אויסלענדישע אָביעקטן.