אַטענטאַט אויף ראַבינאָוויטש

Assassination attempt on Rabinovich

Published March 04, 2013, issue of March 15, 2013.

אוקראַיִנע. — מאָנטיק, דעם 4טן מערץ, ווען וואַדים ראַבינאָוויטש, דער באַקאַנטער אוקראַיִנישער גבֿיר און ייִדישער טוער, איז אַוועקגעפֿאָרן פֿון זײַן ביוראָ, 15:36 אַזייגער נאָכמיטאָג, האָט עמעצער געוואָרפֿן אויף זײַן אויטאָ אַ באָמבע פֿון אַ שכנישן ליידיקן בנין. ראַבינאָוויטש איז באַקאַנט ווי דער פּרעזידענט פֿונעם פּראָפֿעסיאָנעלן קיִעווער פֿוטבאָל-קלוב „אַרסענאַל‟, דער מיטפֿאָרזיצער פֿונעם „אייראָפּעיִשן ייִדישן פּאַרלאַמענט‟ און פּרעזידענט פֿונעם „אַלאוקראַיִנישן ייִדישן קאָנגרעס‟. ער איז דער גרינדער און בעל-הבית פֿון דער נײַעס-קאָרפּאָראַציע „אינטערנאַציאָנאַלע מעדיאַ-גרופּע‟ (MIG).

וואַדים ראַבינאָוויטש
וואַדים ראַבינאָוויטש

אַ פֿאַרבײַגייערין האָט איבערגעגעבן דער פּאָליציי, אַז זי האָט דערזען אַ מאַן, בערך 30 יאָר אַלט, וועלכער האָט זיך געלאָזט לויפֿן אויף דער גאַס, פֿאַרדעקט זײַן פּנים, ווען די באָמבע האָט דעטאָנירט. דער אויפֿרײַס איז געווען גענוג שטאַרק; אין אַ צאָל בנינים זענען אויסזעזעצט געוואָרן די שויבן, און אין אַ צאָל אויטאָס, וועלכע זענען געווען פּאַרקירט נישט ווײַט, האָט זיך אָנגעצונדן דער אַלאַרעם-סיגנאַל. דער מאַן איז אַרײַנגעלאָפֿן אין אַ הויף לעבן דעם אָרט, וווּ דער אינצידענט איז געשען.

דער אויפֿרײַס-מכשיר האָט געבראַכט אַ היזק דעם אויטאָ; קיינער האָט נישט געליטן. די פּאָליציי האָט באַשטעטיקט, אַז די באָמבע האָט אויסגעזען ווי אַ באַלעם מיט אַ הענטל, אָבער דערווײַל זיך אָפּגעזאָגט צו קאָמענטירן דעם אינצידענט.