אָבאַמאַ: וויכטיק איז די אַראַבישע מיינונג

Obama: Arab Opinion Counts

בען ראָדס, דער וויצע־נאַציאָנאַלער זיכערקייט־עצה־געבער
Getty Images
בען ראָדס, דער וויצע־נאַציאָנאַלער זיכערקייט־עצה־געבער

פֿון ייִט״אַ

Published March 15, 2013, issue of March 15, 2013.

ווען פּרעזידענט אָבאַמע קומט קיין ירושלים דעם 20סטן מאַרץ האָט ער בדעה צו זאָגן, אַז ישׂראל דאַרף מער נעמען אין באַטראַכט די עפֿנטלעכע מיינונג פֿון דער אַראַבישער באַפֿעלקערונג, האָט איין עצה־געבער פֿונעם פּרעזידענט איבערגעגעבן.

„ישׂראל, בשעתן שלום־פּראָצעס, וועט דאַרפֿן אָנערקענען די ברייטערע ראָלע וואָס די עפֿנטלעכע מיינונג שפּילט אין דעם‟ האָט בען ראָדס, דער וויצע־נאַציאָנאַלער זיכערקייט־עצה־געבער געזאָגט בײַ אַ באַריכט פֿאַר דער פּרעסע. פּרעזידענט אָבאַמאַ וועט אויך פֿאָרן צום מערבֿ־ברעג און ירדן אויף זײַן וויזיט אין מיטעלן־מיזרח. ראָדס האָט אַזוי געענטפֿערט, ווען מע האָט אים געפֿרעגט, ווי אַזוי די איצטיקע בהלה אין דער אַראַבישער וועלט וועט משפּיע זײַן אויף אָבאַמאַס שליחות.

אין דעם פּרעסע־באַריכט, האָט ראָדס באַשטעטיקט, אַז דער פּרעזידענט וועט זיך טרעפֿן מיט די פֿירער, פֿאָרן אין „יד־ושם‟, און זען צוויי אויסשטעלונגען בײַם „ישׂראל־מוזיי‟ — איינע וועגן די מגילות פֿונעם ים־המלח, די אַנדערע וועגן ישׂראלדיקע טעכנאָלאָגישע חידושים. ראָדס האָט באַצייכנט די מגילות, ווי אַן „עדות פֿון דער אוראַלטער ייִדישער פֿאַרבינדונג מיט ישׂראל‟.

ווען ער וועט זײַן אין ירושלים, וועט אָבאַמאַ, אין זײַן איינציקן אויפֿטריט דאָרטן, רעדן צו אַן עולם פֿון ישׂראלדיקע יוגנטלעכע, ווײַל אַזוי וויל ער. אין 2009, אין קאַיִר, האָט ער גערעדט פֿאַר אוניווערסיטעט־סטודענטן. ער וועט אויך באַזוכן דעם „קלויסטער פֿון געבורט‟ אין בית־לחם.