ידיעות אויף איין פֿוס

News Highlights

Published March 28, 2013, issue of March 29, 2013.

ירושלים. הײַנט קומט פֿאָר דאָס טראַדיציאָנעלע „ברכּת־הכּהנים‟ בײַם כּותל־מערבֿי.

דמשׂק. די אָפּאָזיציאָנערן האָבן פֿאַרניכטעט דעם איראַנישן טראַנספּאָרט־עראָפּלאַן מיט געװער פֿאַרן סירישן רעזשים.

פּיאָנג־יאַנג. דער צפֿון־קאָרעיִשער רעזשים האָט אָפּגעהאַקט די „הײסע‟ טעלעפֿאָן־ליניע צװישן סעול און פּיאָנג־יאַנג. די נוקלעאַר־היסטעריע אין לאַנד האָט דערגרײכט דעם העכסטן פּונקט. די פֿאַראײניקטע שטאַטן: „מיר װעלן פֿאַרטײדיקן אונדזערע פֿרײַנד אין דרום־קאָרעע און יאַפּאַן‟.

פּאָרטוגאַל. די ליסבאָנער גאַסן זײַנען פּאַראַליזירט צוליב די מאַסן־דעמאָנסטראַציעס פֿון די אַרבעטסלאָזע. אַ טײל פֿון די דעמאָנסטראַנטן טראָגן די קאַצעט־קליידער.

קאַטאַר. די ליגע פֿון אַראַבישע לענדער האָט לעגיטימיזירט די אָפּאָזיציע־רעגירונג פֿון סיריע.

אַנקאַראַ. די טערקישע מיליטער־פּאָליצײַ האָט צעטריבן די ברוטאַלע דעמאָנסטראַציע פֿון די סירישע פּליטים. 70 פּליטים װעלן דעפּאָרטירט װערן פֿון טערקײַ.

בעלגיע. די פּאָליציי האָט דערשאָסן אײנעם פֿון די בולטסטע איסלאַמישע טעראָריסטן אין אײראָפּע — כאַקים בענלאַגעם. אין זײַן דירה אין בריסל האָט מען געפֿינען אַ גאַנצן געװער־סקלאַד.

סאָפֿיע. די בולגאַרישע רעגירונג װעט צושטעלן דעם פּאַרלאַמענט פֿון דער פֿאַראײניקטער אײראָפּע קלאָרע באַװײַזן, אַז „כיזבאַלאַ‟ איז פֿאַראַנטװאָרטלעך פֿאַרן טעראָריסטישן אַטאַק אין װאַרנע, אין װעלכן עס זײַנען אומגעקומען פֿינף ישׂראלים און אײן בולגאַרישער בירגער.