אַרציביסקופּ קעגן יום־טובֿים

Archbishop Opposes Holidays

דער ווינער אַרציביסקופּ קאַרדינאַל קריסטאָף שאָנבאָרן
Getty Images
דער ווינער אַרציביסקופּ קאַרדינאַל קריסטאָף שאָנבאָרן

פֿון ייִט״אַ

Published April 04, 2013, issue of April 26, 2013.

ווין. — דער ווינער אַרציביסקופּ האָט געבעטן די עסטרײַכישע רעגירונג נישט אײַנצושליסן די ייִדישע און מוסולמענישע יום-טובֿים אין דער ליסטע פֿון נאַציאָנאַלער פֿײַערונג-טעג. דעם 30סטן מאַרץ, בעת אַ טעלעוויזיע-אינטערוויו פֿאַרן קאַנאַל „ORF‟, האָט דער קאַרדינאַל קריסטאָף שאָנבאָרן געמאָלדן, אַז די ייִדישע און מוסולמענישע קהילות אין עסטרײַך נישט גענוג גרויס, דערפֿאַר זאָלן זייערע יום-טובֿים נישט אַרײַן אינעם קאַלענדאַר פֿון דער אַלגעמיינער באַפֿעלקערונג פֿונעם לאַנד.

שאָנבאָרן האָט צוגעגעבן, אַז 80 פּראָצענט פֿון די עסטרײַכער זענען קריסטן, על-פּי-רובֿ קאַטויליקער. „ס׳איז וויכטיק צו נעמען אין באַטראַכט די מיינונג פֿון ס׳רובֿ מענטשן אינעם לאַנד‟, האָט צוגעגעבן דער אַרציביסקופּ.

לעצטנס, האָבן די מוסולמענישע פֿירער אין עסטרײַך געבעטן די רעגירונג צו דערקלערן איין טאָג פֿונעם חודש ראַמאַדאַן און זייער יום-טובֿ „אייד‟ ווי אָפּרו-טעג פֿאַר די מוסולמענער. דער גענעראַל-סעקרעטאַר פֿון דער ווינער ייִדישער קהילה, ריימאָנד פֿאַסטענבאַוער, האָט מיטגעטיילט דער אָרטיקער אויסגאַבע „קליינע צײַטונג‟, אַז די עסטרײַכישע ייִדן ווילן אויך צו באַקומען דאָס רעכט נישט צו אַרבעטן אין די ייִדישע יום-טובֿים. דער רעגירונג-אָפּטייל פֿון קאָמערץ האָט אָבער אָפּגעוואָרפֿן די דאָזיקע בקשה.

די איסלאַמישע באַפֿעלקערונג אין עסטרײַך באַטרעפֿט פֿון 400,000 ביז 500,000 נפֿשות, לויטן חשבון פֿון די אָרטיקע מוסולמענישע אָרגאַניזאַציעס. אין אַ לאַנד מיט 8.5 מיליאָן תּושבֿים איז עס נישט אַזאַ קליינע ציפֿער. לויט דעם „אייראָפּעיִשן ייִדישן קאָנגרעס‟, וווינען אין עסטרײַך בערך 15,000 ייִדן.